Les termes romanes de Valdunu estrenen la so condición de BIC

El 7 de febreru de 2023 ye la fecha que marcó un antes y un dempués pa la protección de la principal ayalga romana del pequeñu conceyu de Les Regueres. La publicación esti martes nel Boletín Oficial del Principáu d'Asturies (BOPA) del alcuerdu de Gobiernu tomáu pol Principáu'l pasáu 27 de xineru pa declarar les termes romanes de Valdunu como Bien d'Interés Cultural abre d'equí p'arriba la posibilidá de que'l xacimientu pueda optar a más fondos p'ameyorar el so caltenimientu. 

D'esta manera rematase un procedimientu solicitáu pol Conceyu en 2018. La declaración foi acoyida con allegría pola alcaldesa, Maribel Méndez, y l'arqueólogu que dirixió la escavación de les termes romanes de Valdunu, Rogelio Estrada. "Tien muncha importancia, yá que podrá optase a fondos europeos que tán dirixíos a recursos protexíos", indicó la rexidora, en conociendo la decisión del executivu autonómicu. 

El que nel so día fuera un complexu termal romanu ta datáu a finales del sieglu I o principios del II, según les prebes de carbonu 14. La exhumación de les estructures termales romanes fíxose depués del sondéu arqueolóxicu realizáu por mor de la pavimentación de la redolada de la ilesia de Santolaya. 

De magar entamáronse trés campañes arqueolóxiques en Valdunu. La primera d'elles tuvo llugar depués d'atopase los restos y na segunda avanzóse na escavación del área. Na tercera afitóse la zona. Ente los restos ta la bañera romana meyor caltenida del norte de la Península, según les esplicaciones de Rogelio Estrada . 

L'arqueólogu que dirixió la escavación de les termes romanes considera que podría siguise cola intervención nel área. Rescampla les sos posibilidaes turístiques, en viendo la entidá del conxuntu termal y la so situación privilexada, "a diez minutos d'Uviéu y per autopista, sacantes un pequenu tramu". "Y col Camín de Santiago a 50 metros". 

Una y bona que se llogró esta declaración, el Conceyu de Les Regueres confía en llograr tamién llueu la mesma reconocencia pal xacimientu de la villa romana de La Estaca, que les sos campañes vienen desarrollándose nos últimos años so la dirección del arqueólogu Juan Ramón Muñiz. La mesma ta en camín de consiguise, pues la conseyería de Cultura yá abrió'l pasáu avientu l'espediente por que la villa s'axunte al llistáu rexonal de los BIC.