Los vecinos pintaos de Vilauril: María del Roxo quier contribuyir a que l'aldea se sienta habitada tol añu
L'artista entama nel so pueblu, n'Ibias, un proyectu singular d'arte comuñal
María del Roxo, va unos años, cuando empezó a pintar el mural de dellos vecinos que ta asitiáu a la entrada del pueblu. | Imaxe de M. del Roxo / Ana Paz Paredes
Añádenos en GoogleCorría l'añu 2008 cuando l'artista María del Roxo, con raigaños familiares nel pueblu de Vilauril, n'Ibias, recreó nun mural a dellos vecinos, ente ellos los sos padres, cola idea de "encuriosar un poco el llateral d'una cochera que taba feísima. Díxi-y al dueñu que, si la llucía, facía-y un mural por que la entrada al pueblu se viera guapa. Él fíxolo, y yo cumplí, pero entós nun pretendía más", esplica .
Otra de les vecines representaes pola artista, nel so pueblu. / Imaxen cedida por María del Roxo
Sicasí , dempués d'un tiempu –concretamente l'añu pasáu–, Del Roxo entamó'l so proyectu "Érase una vez en Vilauril", una iniciativa artística comuñal na que, amás d'a vecinos y familiares, convida a participar tamién a artistes esternos. Con ello quier, amás de llograr un fortalecimientu de los llazos vecinales, enguapecer el pueblu y la so redolada.
Otru de los vecinos, representáu a la puerta d'una corte. / Imaxen cedida por María del Roxo
"Yo empecé incorporando na ventana d'una casa un cuadru que fixera d'unes neñes, como si fueren unes vecines asomaes. Ye un cuadru fechu sobre una tabla y metíu contra la ventana . Depués, nuna casa abandonada onde había una puerta de madera con una testura preciosa quemada pol sol, pinté a un señor del pueblu, y asina, a poco y a poco, y n'otros sitios, pinté otra señorina más y otros cuatro. Tamién hai un par d'escultures naturales", esplica esta pintora y escritora, autora del blogue "Ibias: El Lejano Oeste", y coautora de "Ibias, guía completa", de Calecha Ediciones.
Un vecín, representáu nuna de les viviendes. | M. del Roxo / Ana Paz Paredes
La idea d'esta artista, fondamente namorada del so pueblu natal y onde tán los sos raigaños, ye contribuyir tamién a que l'aldea se sienta habitada los 365 díes del añu, incluyíos los dos meses más duros en que casi nun queda naide en pueblu. "Eso solo pasa nos díes más fríos, porque casi tol añu hai xente y entá más cuando llega'l branu, cuando podemos axuntar ellí ente 30 y 40 persones", sostien.
Cuadru de les trés neñes que paecen tar asomaes, nuna casa del pueblu de Vilauril, n'Ibias. | Semeya de María del Roxo / Ana Paz Paredes
Les intervenciones artístiques son a pequeña escala, "nada de macromurales", matiza. "Tienen que ser obres pequeñes, respetuoses col espíritu del pueblu y con materiales naturales y sostenibles", detalla esta muyer qu'afirma que los vecinos d'esta pequeña aldea d'Ibias tán encantaos.
L'artista asturiana , el día qu'empezó a pintar el muriu con dellos vecinos del pueblu. / Imaxen cedida por María del Roxo
María del Roxo cree qu'esta puede ser una bona idea, amás, p'atraer turismu al territoriu, ya inclusive convida a localidaes cercanes a facer lo mesmo. "Sería bien guapo facer una ruta ente dellos pueblos que s'arreyaren nesti tipu de proyectos", amiesta l'artista, a pesar de que la zona nun tenga practicamente agospiamientos y bien poca restauración, lo que permitiría que la xente allegara a pasar dellos díes y afayara la guapura y riqueza del so conceyu.
Otra vecina de Valdebóis, reprentada por María del Roxo na puerta d'una casa del pueblu. / Imaxen cedida por María del Roxo
Ella, pel momento, convida a participar a cuantos artistes se sientan implicaos nesti proyectu nel que, ensin duda, lo que predomina, amás de la busca de la guapura, ye l'amor por Vilauril.
Un par de bancos fechos polos vecinos, nún de los requexos coles meyores vistes del pueblu. / Imaxen cedida por María del Roxo
- La familia fallecida en Palencia sufrió el accidente en el mismo punto donde murió la médica gijonesa hace un mes: 'Esa autovía parece un campo de minas
- Cascada de reclamaciones en las oposiciones docentes: desborde de suspensos y calificaciones que no alcanzan el mínimo exigido para que compute la prueba
- Tragedia en el rally de Carreño: fallece un fotógrafo atropellado por un coche, que salió volando de un cambio de rasante
- Llega una nueva aerolínea 'low cost' a Asturias: operará la conexión a Londres que iba a dejar Vueling en octubre y dos más
- La receta contra las faltas de ortografía de un catedrático de Lingüística: dejar las pantallas y leer más en papel
- Muere una joven de Pravia de 24 años en un accidente de moto en el recinto del Motorbeach de Vinuesa (Soria)
- Noche tropical en Asturias antes de llegar a la cresta de la ola de calor: la AEMET activa una alerta especial hasta las 21.00 horas del lunes
- Educación atribuye el elevado número de suspensos en las oposiciones de maestro a "faltas de ortografía y de sintaxis" y a "fallos de compresión lectora"
