Los escanciadores van tener "estatus de sumiller", garantiza la patronal hostelera

Un oficiu que "va tener el estatus de sumiller nel nuevu conveniu de la hostelería rexonal" y al que-y "fai falta reconocimientu económicu y social", porque "los escanciadores sois l'alma d'Asturies". Nestos términos emponderó esti día a los echadores de sidra'l presidente de la patronal hostelera, José Luis Álvarez Almeida, na entrega de los premios del concursu rexonal d'escanciadores, celebráu nel Muséu de la Sidra de Nava, y que se convirtió nun encendíu alegatu al oficiu. 

Porque "cola llegada de l'AVE el turismu en tren va a triplicase n'Asturies, y l'escanciáu ye la gran singularidá rexonal", y fai falta "entamar cuanto primero los certificaos de profesionalidá", por que los especialistes del sector tean "nel llugar que se merecen". Y por que, de camín, como señaló nel actu la directora xeneral d'Agroalimentación, Begoña López, "s'empiece a pagar por una botella de sidra lo que val, por que una botella a 3,50 euros dexe de ser daqué inesplicable". 

Meyores

Tou un llamamientu en pos de les meyores necesaries pa unos profesionales qu'esti añu s'esbrexaron en duelu nun total de 18 pruebes puntuables por tolegrafía asturiana. L'añu qu'entra van ser 19, cola recuperación del campeonatu de Navia, tal qu'avanzó'l coordinador del concursu, el navetu Saúl Moro. 

Nesta edición el ganador foi, per quinta vegada, Salvador Ondó, siguíu por Jorge Vargas, Wilkin Aquiles, Jonathan Trabanco, Pelayo Rodríguez, Alberto Truchado, Humberto Rey, Pablo Suárez, Rubén Campa y Antonio Sorca. Na categoría sub-25 resultaron ganadores Daniel Rujas, Alexander Gabriel y José Ramón. Toos ellos el "top" de la cara más visible de la hostelería asturiana.