Asina ye la gran casería robotizada de Porrúa: "Les máquines meyoren la producción y tolos procesos"

L'amiestu de la cantidá xusta pa l'alimentación de les vaques, la distribución de la comida, la llimpieza de la estancia de los animales, el muñíu y una climatización afayadiza na nave son solo dellos de los llabores que na ganadería La Peña se faen de manera automatizada con ayuda de la tecnoloxía más piquera. Esta casería allugada na localidá llanisca de Porrúa ye una de les esplotaciones ganaderes más robotizaes dientro y fuera de les fronteres asturianes. 

 N'estudiando Dirección Comercial y Marketing y tener otres esperiencies profesionales, Hernán Haces decidió apostar, xunto al so hermanu Pelayo, pol oficiu que yá exercieron los sos güelu y depués so padre, pero con un planteamientu distintu. «Buscando'l bienestar animal sofites na robótica, que ye lo que ta llantao nos países más piqueros nesti sector y qu'amás permite optimizar tou y facilita'l manexu y el trabayu de les vaques», comenta l'empresariu.

Viaxaron y conocieron esperiencies asemeyaes n'Holanda ya Italia y decidieron remar nesa dirección anovadora. La planta ta diseñada pa tresformar la lleche n'esitosos productos artesanos como croquetes, yogur o quesu fresco sol nome comercial de «Leche Leche» y amás realicen visites empobinaes y degustaciones onde la xente pueden conocer el trabayu de la casería amás de poder probar a dar un biberón a un xatu naciellu ya inclusive catar una vaca. «Asturies tien potencial enforma en agroturismu», comenta Haces, que ve cómo los visitantes queden ablucaos cuando conocen cómo se trabaya nesta esplotación. «Fai falta conectar a la sociedá cola ganadería y l'agricultura. La xente vien y plasma y valora lo que ve», comenta.

El director xeneral d'Innovación, Investigación y Tresformamientu Dixital, Iván Aitor Lucas, visitó esti día la casería xunto al presidente y al xerente de la Cooperativa de Ganaderos d'Asturies (Ascol), José Emilio García y Mauro Vega respeutivamente. 

Los veceros de los hermanos Haces son directos, la mayor parte venceyaos a la hostelería. La empresa distribúi los sos productos n'Asturies y Cantabria. «El valor añedíu que tienes nel productu final ye gracies a tener la lleche nel momentu», comenta Hernán, que destaca que los sos productos «son de cercanía» y «bien valoraos» pola hostelería.

Les máquines nun eviten qu'haya que permanecer na esplotación tolos díes, pero meyoren la producción y tolos sos procesos, de la que favorecen el control de los costos de producción.

«Tener internet nes caseríes ye vital», comenta'l ganaderu, que tien un centenar de vaques de la raza Holstein que producen cerca de cuatro mil llitros de lleche al día.

Iván Aitor Lucas reconoció que la casería llanisca ye un exemplu de «cómo la tecnoloxía puede ayudar al sector primariu nuna zona rural. La parte d'I+D+i puede aplicase directamente nel ámbitu agroalimentariu y nel sector primariu», amás de meyorar otros aspeutos como la producción de la esplotación o la calidá de vida de los propietarios. 

«Ye cosa de comprobar que la robotización puede facese nes caseríes y que'l trabayu del campu nun ye como d'antiguo. La robotización y recoyida de datos llévennos a un meyor manexu de les caseríes, meyores calidaes de la lleche y una mayor producción, amás de que los animales tean más seles y vivan con más calidá», señala José Emilio García.