El colexu Gesta afonda na esperiencia mindfulness. A la que yá se fixo nel recréu na sala habilitada pa ello axuntóse la sesión realizada por tol alumnáu primero d'empezar la xornada de tarde. Agora, nestes últimes selmanes, fundiéronse dos proyectos, "Somos música" y "Gesta inspira", con sesiones pal alumnáu de primer y segundu cursu de Primaria. El resultáu foi qu'al mindfulness que se practica nel centru dende va meses axuntóse la música en directu. "Ye una esperiencia mui especial", aseguró Sandra Carranza, coordinadora de "Gesta inspira".
L'actividá pudo desenvolvese cola collaboración del Dúo A Tempo, agrupación de cuerda formada por Virginia Fernández y Paula Prieto. La primera d'elles, que toca'l violonchelu, realizó les sos práctiques de Maxisteriu nel colexu Gesta. Esta circunstancia fixo que nel centru camentaren na fusión de los dos proyectos, indicó Carranza.
El primeru d'ellos, "Somos música", que coordina Ramsés García permite la organización d'una actividá musical cada mes nel centru. La postrera foi la visita de Pablo García, guitarrista de la banda asturiana de heavy metal "WarCry". El segundu centróse en "el trabayu de les emociones y la relaxación", nel que s'exercitaron nesti cursu los alumnos del colexu.
L'actividá de mindfulness que se pon a disposición de los escolares nos recreos empobínase a los cursos de terceru p'arriba. Por eso, recalcó Sandra Carranza, "decidióse qu'esti nuevu proyectu se dirixera a los alumnos de primer y segundu cursu". "Ye un xeitu de dir introduciendo a los neños d'eses edaes nestes sesiones", fixo la docente .
La esperiencia desarrollóse n'horariu lectivu y con una sesión por cada grupu. Tamién nel apartáu de formación a families, a la qu'alleguen xunto a los alumnos, les sesiones xiraron alredor de la música en directu. Esta actividá empobinóla la coach Tania Hernández. "Diéronse unes sinerxes importantes", aseveró la coordinadora de l'actividá de mindfulness.
La xuntura de los dos proyectos "surdió de la oportunidá", dixo Carranza. Pero'l centru yá proxecta "da-y continuidá a la iniciativa". Sería yá nel próximu cursu. Podría encontase en familiares de los alumnos que sían músicos o al Conservatoriu, sostien.
El colexu Gesta realizó apocayá una evaluación sobre la esperiencia desenvuelta col mindfulness primero d'empezar la xornada de tarde, na que participó tol alumnáu. "Les respuestes fueron bien positives al considerar la mayoría que les sesiones meyoren la relaxación de los alumnos y que tamién tienen beneficios pal profesoráu", manifestó Sandra Carranza.
Por eso, pretende entamase nel próximu cursu escolar "una aplicación ameyorada". Nel actual desenvolvióse, a lo llargo de delles selmanes, una esperiencia piloto trés díes a la selmana: llunes, miércoles y vienres.
