El Muséu de la Sidra de Nava va potenciar el conteníu dixital p'atraer públicu mozu

El Muséu de la Sidra d'Asturies, con sede en Nava, va tener un "orixinalísimu" programa d'actividaes y va anovar la so esposición con elementos dixitales, tecnolóxicos y de realidá aumentao. Ye la receta pa dexar atrás la crisis económica y de visitantes qu'a piques tuvo d'acabar nel pieslle va unos pocos años, y tamién pa convertilu definitivamente nun referente internacional del sector. La Fundación de la Sidra , l'organismu públicu-priváu que gobierna l'equipamientu, confía na empresa Pictures &Things por que lidere darréu esti procesu de recuperación, al traviés d'un contratu de dirección pal próximu llustru. La firma xixonesa va ser la encargada de dar forma y desenvolver el plan de reactivación aprobáu en 2021 y que cuenta facer inversiones por valor de 872.215 euros en cuatro años. 

Amás, la modernización de la esposición, que quedó anticuada al poco de ser anovada dende la inauguración del muséu en 1996, va recibir una inyección económica de los fondos europeos Next Generation. Va ser al traviés del Plan de Sostenibilidá Turística de la comarca. 

La Fundación de la Sidra, presidida pol alcalde de Nava, el socialista Juan Cañal, analizó dos ufiertes pa cubrir la plaza de dirección del muséu, vacante dende la dimisión de Elías Carrocera en 2014. Del planteamientu de Pictures&Things gustó especialmente la so visión de los retos y oxetivos qu'encara l'equipamientu, mesmo que la so "ambición" pa reorganizar la estructura y l'esposición, cola implantación de "elementos dixitales particularmente interesantes". Amás, na decisión a favor de la empresa xixonesa, con esperiencia n'otros centros museísticos de la rexón, tamién pesó la intención d'aplicar un "plan d'actividaes d'una gran orixinalidá" y el qu'apurriera "una relación mui completa de posibles collaboraciones concretes con instituciones, organizaciones y entidaes venceyaes a la sidra y al turismu". 

Nesta apertura del centru a la sociedá, la Fundación de la Sidra tamién pretende que dende la nueva dirección s'afale la creación d'una asociación d'amigos del muséu, y tamién la potenciación d'actividaes amestaes cola gastronomía de la sidra, de gran raigón en Nava gracies a unes xornaes culinaries que se celebren nel conceyu dende va delles décades. 

Incrementar la interactividá del muséu por que resulte más interesante al públicu infantil y xuvenil, modernizar la esposición ensin perder de vista'l so calter etnográficu, incorporar alicientes pa motivar la repetición de la visita ente'l públicu asturianu, fornir los espacios comunes pa celebrar actividaes alternatives, promover la investigación en materia sidrero o convertir el muséu nel gran llugar d'alcuentru pal sector figuren ente los retos qu'asume la nueva dirección. 

 Esta vuelta de tuerca organizativa pilotada por una xestión profesionalizada, la renovación espositiva, l'establecimientu d'alcuerdos y collaboraciones de toa triba con otres entidaes allegaes, mesmo nacionales como internacionales, o la potenciación de les actividaes publicitaries y nes redes sociales tienen de tener reflexu nes cifres de visitantes. Tomando como base los datos del plan de reactivación, la Fundación márcase como oxetivu que l'enclín al alza s'empiece a notar yá nesti 2023, de forma que en 2024 se doblen les llegaes de los últimos años, aportando a les 40.000 entraes vendíes. Eso supondría averase o igualar los datos de 2007, cuando'l muséu entá nun entrara en crisis. Pa 2025, una vegada que se rematara'l plan, la previsión ye algamar los 65.000 visitantes. Tou ello notaráse na recaudación por taquilla, magar les previsiones de la Fundación nye que xuban tamién exponencialmente mientres los próximos exercicios los ingresos por ventes na tienda, a la que tamién se -y va a dar una vuelta, por patrocinios y por actividaes cofinanciaes. Son campos nos qu'apenes s'avanzó nos últimos años y pa los qu'agora se marca l'oxetivu de llegar a los 40.000 euros d'ingresos en 2025. 

Depués de más d'un cuartu de sieglu d'irregular andadura desque l'entós Príncipe Felipe lu inaugurara, nuna xornada histórica na que l'actual monarca apurrió a la comunidá vecinal de Nava'l títulu de "Pueblu exemplar", el muséu vese obligáu a reinventase y afayar conteníos a les nueves tecnoloxíes. Esti añu yá se van entamar les primeres iniciatives por que'l muséu espalme y se convierta na gran casa de la sidra y la so cultura.