Un cuartu de sieglu de la semeya de "Cuervo", el primer osu que retrataron les cámares del Fapas

El primer (y postreru) posáu del osu "Cuervo" foi n'abril de 1998. Nun foi una esclusiva paga sinón un robáu, como'l que-yos faen a los famosos na playa tolos branos. Detrás de la cámara, mesmo qu'un "paparazzi" de los montes, taba Alfonso Hartasánchez, del Fapas (Fondu pa la Protección de los Animales Selvaxes). Un cuartu de sieglu dempués, confiesa que, primero de facer la histórica fotografía –la primera que se tomó por aciu d'un sistema de cámares automátiques–, tenía dudes sobre la so utilidá. "Nun taba mui convencíu de que fuera sirvir pa daqué –remembra–. Pensaba : ¿Pa qué queremos esto?". Seis díes dempués d'asitiar la cámara nel monte de Somiedu, rexistróse la primer imaxe d'un osu pardu. Anque eso supiéronlo unos díes dempués. "Como la cámara yera analóxica, había que llevala a revelar, y esperar quince díes pa ver qué coño había na cámara", recuerda l'hermanu d'Alfonso, Roberto, presidente del Fapas. 

Les traces físiques del animal llamaron l'atención d'Alfonso: "Taba gordu como una peonza, y ello ye raro teniendo en cuenta que tábemos yá n'abril, una temporada na que tendría de tar más delgáu porque acababa de salir d'ivernar". Cuando empezaron a rexistrar imaxes de los osos, el Fapas apenes tenía instalaes trés cámares de siguimientu nos montes asturianos. Un cuartu de sieglu depués, yá en plena era dixital, tienen distribuyíes cien cámares per tol territoriu qu'unvien nel intre les imaxes al ordenador correspondiente .

La carrera como modelu de "Cuervo", sicasí, resultó efímera. "Al poco tiempu de fotografialu, cayó nuna trampa de radiomarcaxe y acabó finando porque naide foi a rescatalu –cuenta Alfonso–. Dicíase que yá venía de mala traza, que tenía una pata mancada ... pero la mio semeya demostró que nun yera asina porque, trés díes enantes, na imaxe víaselu perfectamente. Esos díes taba nevando enforma, y los investigadores pensaríen que l'animal que cayó na trampa yera un raposu o un melandru". La trampa de la discordia asitiáronla investigadores, según el relatu de los hermanos, col fin de prindar un osu y pone-y un collar de radiomarcaxe pa face-y un siguimientu, práctica que s'entama na actualidá anque con mayores garantíes de seguridá.

La población d'osos pardos aumentó notablemente nos postreros venti años. "Cuando empezamos –cuenta Roberto Hartasánchez– había 40 o 50 osos nel Cordal. Agora tamos alredor de los 300, con unes 80 femes reproductores, una cifra baxa que fai que, técnicamente, tean en peligru d'estinción". La medría del númberu d'exemplares guarda relación, argumenta Roberto, cola mayor protección que se-yos da. Sicasí, denuncia que nes dos últimes llexislatures "abandonóse" la política de protección, circunstancia que xenera una problemática "mui potente" colos cazadores furtivos.

Con too y con ello, 25 años depués de la sobrevenida fama de "Cuervo", los osos cada vez aprucen más vegaes a los humanos: tienen murnia –cuando se peguen una panzada de comer, al otru día pasenlu tiraos ensin facer nada, rellata Roberto– y, visto lo visto, hasta podríen abrir una cuenta d'Instagram.