Un tren pa sentise "como en casa": asina ye'l luxu del Costa Verde Express

"Esto nun ye nin un AVE, nin un cercaníes, ye un tren pensáu pa un públicu perespecial, al que vamos amosar la riqueza paisaxística, gastronómica y cultural de la cornisa cantábrica por que marchen con una alcordanza única, una esperiencia vital candial". Félix Martín, director d'Área de Negociu de Nuevos Productos en Renfe Viaxeros, definía asina al Costa Verde Express, ún de los trés trenes turísticos luxu de Renfe (los otros dos son el Trescantábricu y l'Al-Andalus), qu'esti día entamó n'Uviéu'l primer viaxe de la temporada, que se va allargar hasta'l 21 d'ochobre. 

Cuarenta y seis pasaxeros, la mayoría estranxeros, ocuparon los trece coches, qu'axunten venticuatro suites de luxu climatizaes, con bañu completu y ducha d'hidromasaxe, salones comedor, biblioteca, vagón cafetería, cocina, bodega ya inclusive un vagón pub, con música grabada y en directu, nel que s'entamen fiestes. Tou ello completáu con dos locomotores nun viaxe que los llevará a lo llargo de los próximos díes hasta Santiago de Compostela, con paraes nos llugares más emblemáticos del percorríu.

El convói lluz una imaxe anovada dafechu, con motivos rellacionaos cola "España Verde". Seis persones dedicaes a atender a los veceros, dos cocineros, dos técnicos, un maquinista, una xefa d'espedición (directora d'hotel) y ún o dos guíes –depende del viaxe– componen el personal a bordu. Ente les primeres, la moldava Ekaterina Gosteva; Diana Caldevilla, nacida n'Alemaña, pero "medio gallega, medio asturiana"; la vallisoletana asitiada en Llanes Saray de la Fonte, la berciana Elena Fernández y el L.luarqués Juan Ramón "Moncho" Fernández, ún de los veteranos porque suma yá 15 años de trabayu nos trenes de luxu de Renfe. 

"Trabayamos abondo, tenemos que tar al día de too, al tantu de tolos detalles y de cualquier cosa que-y faiga falta al pasaxe", esplica Gosteva. Podría dicise que toos ellos viven nel tren, porque amás de cumplir l'horariu de trabayu, pernocten nél. Les sos habitaciones quiciabes nun sían tan luxoses como les suites, pero sí son "mui cómodes. Sentímonos como en casa", rescampla Moncho Fernández. Los veceros, tamién. Esti añu, como novedá, amás de los viaxes regulares habituales entre Bilbao y Santiago (cinco díes y seis nueches), va haber tamién "viaxes mini". 

Los viaxes inclúin almuerzos, comíes y cenes a bordu o en restoranes escoyíos, visites empobinaes, entraes a monumentos y espectáculos, actividaes, guía multilingüe en tou'l percorríu y autobuses pa desplazamientos.