Una esposición nel Arqueolóxicu revisa tolos significaos de Cuadonga

Con más fotografíes y más instalaciones sonores, pero col mesmu blancu nes parés y la mesma falta d'interpretación sobre les obres "por que cada visitante busque'l so propiu significáu", presentábase esti día nel Muséu Arqueolóxicu la esposición "Aquella comunidá imaxinada", que depués d'un pasu previu inaugural per Cangues d'Onís, va tar nel muséu uvieín hasta'l 25 de xunu. 

Trátase d'un proyectu ellaboráu nel marcu de la celebración de los 1.300 años de la batalla de Cuadonga, comisariáu por Natalia Alonso Arduengo y col trabayu fotográficu de José Ferrero y el sonoru de Mind Revolution. Una propuesta que busca otru aproximamientu al paisaxe cultural, social, rural y natural de Cuadonga "dende la densidá de connotaciones que tien esi espaciu tan simbólicu", esplica Natalia Alonso Arduengo. 

El primer impactu llógrenlu una serie de fotografíes "que reclamen la mirada lúcida y la interpretación irónica. Toes tán abiertes a segundes llectures y les sos instantánees emburrien al cuestionamientu de los tópicos", diz la comisaria. Fotografíes de pintaes na carretera de la Vuelta Ciclista a España, de la Virxe de Cuadonga vista dende un monitor de televisión, requexos d'ún de los santuarios relixosos más conocíos d'España... A eses fotografíes acompáñenles pieces sonores "pa les que fai falta una escucha atenta". Instalaciones sonores y fotografíes que dialoguen ente elles, xenerando un ambiente envolvente que va más allá del Santuariu y que s'esparde a la redolada natural y rural. 

"Quixímos superar l'espaciu de Cuadonga como una postal, el que conocen tolos turistes", cavilga Natalia Alonso Arduengo. "Muncho más que'l Real Sitiu, muncho más que la fonte a la que tirar monedes, y muncho más qu'esi símbolu que tanto s'utiliza inclusive políticamente", añede , "casi tou tien un doble sentíu pa nun quedanos no superficial y que'l visitante enfrente dende la polisemia los significaos d'una Cuadonga que va más allá de los tópicos".