El "coche fantásticu" de Los Barreros compite en Francia por ser el más ecolóxicu

El “coche fantásticu” del IES de Los Barreros compitió estos díes por ser el más ecolóxicu. El circuitu de la localidá de Nogaro, nel suroeste de Francia, acoyó la competición “Shell Ecu-marathon”, una actividá entamada pola multinacional Shell pa “fomentar el desenvolvimientu de nueves tecnoloxíes aplicaes al tresporte nel marcu de la sostenibilidá, cola particularidá de que ta dirixida a estudiantes”. Búscase percorrer la mayor distancia col menor gastu de combustible. El programa axunta a estudiantes de Ciencies, Tecnoloxía, Inxeniería y Matemátiques (STEM) de tol mundu pa diseñar, construyir y operar dellos de los vehículos con mayor eficiencia enerxética del planeta.

“Dende el IES Altu Nalón consideramos que los valores y la finalidá d'esti eventu afáyense perfectamente a oxetivos que buscamos consiguir colos alumnos. Amás, presenta valores añedíos como l'intercambiu cultural y l'usu d'una llingua estranxera una y bones l'idioma oficial del eventu allá onde se celebre ye l'inglés”, indicaron los responsables del centru docente llavianés. Fai yá más de 25 años qu'el IES Altu Nalón toma parte na competición. L'equipu siempre tuvo formáu por profesores encabezaos por Santiago Viña Fernández y Francisco Díaz Lobo y alumnos de segundu cursu mesmo del ciclu de Carrocería como d'Electromecánica. Pa esti añu 2023, xunto a Viña y Díaz Lobo va tar como profesor Eduardo del Río Prieto y un grupu de 13 alumnos y alumnes “que van tener que demostrar les conocencies y habilidaes aprendíes nel centru”.

La participación del centru nesta competición empezó nel añu 1994, “pero'l verdaderu momentu de cambiu foi l'añu 2008 cuando l'equipu consiguió'l premiu al meyor diseñu na categoría ‘urban concept’”. Por aciu del destacáu papel del equipu llavianés nel diseñu y la fabricación d'estos vehículos, en 2008 la multinacional Shell encargó un prototipu al equipu Alton Nalón y dende l'añu 2012, l'IES Altu Nalón encárgase del caltenimientu de los vehículos de prensa na competición. El centru consiguió'l segundu puestu na categoría de "prototipos diésel" nos años 2014, 2015 y 2016 llogrando una marca de 1.297 kilómetros percorríos per cada llitru de combustible.

"Esti añu", esplicaron dende'l centru, la competición "presenta un entueyu añedíu visto que pa esta edición tamos preparando una evolución del prototipu col que yá consiguimos mui bonos resultaos, pero esta vegada propulsáu por un motor de gasolina desarrolláu nes instalaciones del centru. Nesta nueva etapa ponse'l ramu a una llarga llista de participaciones con mecániques diésel nes que'l IES Altu Nalón asitió como un equipu de referencia na hestoria de la competición gracies al trabayu y el compromisu del equipu docente y de los sos alumnos".

Los responsables del IES Altu Nalón tamién indicaron que "la nuesa esperiencia diznos que lluchar polos primeros puestos ye una xera difícil dáu l'eleváu nivel que presenten los equipos participantes. Nel equipu Altu Nalón sabemos que desenvolver un nuevu sistema de propulsión ye difícil, pero somos realistes y el nuesu oxetivu ye terminar la carrera cerca de los primeros puestos".

Ciclu

Ente la ufierta formativa del centru ta'l ciclu d'Electromecánica de vehículos automóviles y el de Carrocería. "Nel IES Alton Nalón tradicionalmente participemos en competiciones, construyendo los nuesos propios prototipos xunto colos nuesos alumnos. Al traviés d'estos proyectos l'alumnáu pon en práctica toles competencies aprendíes nel ciclu y amás foméntense valores fundamentales como'l trabayu n'equipu, la responsabilidá dientro d'una organización, el respetu y la competitividá. Toos estos valores son imprescindibles dientro del mundu llaboral, que ye l'oxetivu d'esta formación", indicaron los docentes.