Utres y perros, les especies más afectaes por cebos envenenaos contra la fauna montesa

Ente los años 2001 a 2022 tramitáronse n'Asturies 244 espedientes de casos sospechosos d'envenenamientu illegal de fauna montesa. Los análisis veterinarios y toxicológicos confirmaron qu'efectivamente hubo envenenamientu en 112 casos, siendo les especies más afectaes la utre, los perros (afectó a 33 exemplares) y los raposos. Los llobos, que suelen ser el principal oxetivu nesos envenenamientos, resultaron ser les víctimes solo nel 9% de los casos confirmaos. 

Amás, ente los exemplares envenenaos tamién figuren dellos incluyíos nel Catálogu Español d'Especies Amenaciaes, concretamente cuatro zapiqueres, cuatro frangüesos, trés osos pardos, dos llondrigues y un águila prieta. 

Esos datos conséñense nun informe que sirvió de base al Gobiernu d'Asturies pa ellaborar la estratexa contra l'usu illegal de venenu, acabante publicar nel BOPA, y que refuerza la rede autonómica de vixilancia. 

L'oxetivu d'esta iniciativa, según espliquen dende la Conseyería de Mediu Rural, ye contribuyir al caltenimientu de la biodiversidá, los ecosistemes y el bienestar humanu una y bones "l'usu de cebos envenenaos nel mediu natural, tradicionalmente usada pal control d'especies qu'amenacien intereses humanos como'l ganáu, los cultivos o la caza, constitúi una grave amenaza". D'ehí que se quiera desaniciar el so usu y ente les llinies d'actuación inclúyese la valoración de crear, cola collaboración de los establecimientos de venta de productos fito y zoosanitarios, un rexistru d'usuarios de, siquier, aquellos productos con potencial pa ser usaos como venenu. 

Según l'estudiu asturianu, los productos más utilizaos pa envenenar los cebos suelen ser la estricnina y los carbamatos y organofosforaos; y los cebos más comunes son los derivaos cárnicos, los restos de comida y en dalgún casu los granos de cereal. 

Nesi diagnósticu de lo que pasó tocantes a los envenenamientos nestos postreros 20 años, tamién se conseña que n'Asturies principalmente recúrrese al envenenamientu pa evitar los ataques del llobu a la cabana ganadera "lo que rescampla la necesidá de trabayar nesa llinia yá marcada pola Estratexa Nacional p'amenorgar la conflictividá nesti ámbitu", sostienen los redactores de la Estratexa contra los envenenamientos. 

El testu tamién esplica que col aquel de que les intervenciones contra los envenenamientos seyan efectives va haber qu'ellaborar un plan d'acción centráu en trés árees clave: La información y meyora de la conocencia sobre esti problema, pa entamalu d'un xeitu axil y amañosu (lo qu'inclúi meyorar la localización y el procesamientu de cebos y casos posibles d'envenenamientu); la prevención y disuasión, por aciu de la promoción d'actuaciones empobinaes a menguar la conflictividá ente los humanos y la fauna montesa (especialmente colos grandes depredadores, como'l llobu y l'osu). Y como tercer área a reforzar apúntase "la persecución del delitu al traviés d'equipos preparaos pa procesar afechiscamente les amueses ya investigar cada casu con rigor y garantíes".