Infidelidá, amor y poder: asina foi la historia de Doña Urraca, la Reina d'Asturies que vivió en Pel.luno

Qué pena que nel sieglu XII nun hubiera redes sociales. Porque diben arder cola historia d'amor -y adulteriu- del rei Alfonso VII "L'Emperador" y Doña Gontrodo. Son los padres de Doña Urraca l'Asturiana, frutu d'una aventura de palaciu. L'orixe del amoríu relacionóse siempre al conceyu d'Ayer, anque tuvo arrodiáu d'un velu de lleenda. Hasta agora: los vecinos de Pel.luno aseguren qu'axuntaron yá un bon tomu de documentos qu'acrediten l'orixe de la noble en pueblu. Esti día, la localidá viaxó al Medievu pa celebrar la so fiesta n'honor a la soberana: "Pel.luno Medieval". 

"Reivindicamos la figura de Doña Urraca como daqué de nueso, ye la nuesa seña d'identidá. Axuntáronse datos y documentos hasta formar un completu archivu de la so vida y la so obra", afirma Eva Fernández, presidenta de l'asociación de vecinos "Peña Mea" que, amás d'investigar la Hestoria, tamién entama l'alcuentru medieval nel pueblu. Asina que lo que sigue ye un resume de tola información, apurríu por Fernández.

La historia del rei Alfonso VII y Doña Gontrodo sería güei escandalosa. Resulta que "L'Emperador" aposentó nel castiellu de los condes don Pedro Díaz y doña María Ordóñez, que taba en Pel.luno. ¿Qué facía Alfonso VII n'Ayer? Tou indica que taba folgando depués una batalla qu'abanderaba otru conde -don Gonzalo Peláez-. Asina que'l rei, que diba quedase unos díes, allargó la estancia. Dicía que pol paisaxe, pero lo cierto yera que se "namorara" d'una de les fíes del so amigu. 

La moza, nun podía ser d'otra manera, yera doña Gontrodo. Afirmen en Pel.luno que yera, por muncho, la más guapa de les fíes de don Pedro. El rei tenía bon gustu y, a la vista ta, yera un bon conquistador. Doña Gontrodo nun tardó en corresponde-y. Dicen que se víen a les escondidielles, porque él taba casáu. Inclusive hai una lleenda sobre un pasadizu soterrañu, que xunía Pel.luno cola torre de Sotu p'axuntase ensin ser vistos. Esti estremu nunca foi confirmáu. 

Reina

Lo que ye seguro ye que d'aquella aventura extramarital nació una neña, Doña Urraca. Rellata Eva Fernández que, "nacida en Pel.luno, Doña Urraca siempre tuvo'l sofitu y los cuidaos del Monarca". Nun hai manera d'equivocase, fae la representante vecinal: "Nació nel añu 1132, en Pel.luno". Hai pocos datos de la so infancia, pero ye seguro que foi bien curtia. En 1144, con doce años, yá yera esposa. Casó con García Ramírez, rei de Navarra, en Lleón. De la unión nació una neña, a la que llamaron Sancha. El matrimoniu nun llegó a les dos décades porque, en 1150, el soberanu finó . 

Cunten que doña Urraca l'Asturiana quedó mui atristayada. Y so padre, de tanto vela penar, quixo desquitala con un títulu: nomola Reina d'Asturies. Más xestu d'amor que cargu, porque realmente ella nun reinaba. Y equí vien otru xiru na historia: doña Urraca volvió casar, esta vegada col noble Álvaro Rodríguez. Y xuntos, intentaron la independencia d'Asturies. Foi daqué más qu'un sustu, porque se conseña nos documentos que Fernando II -mediu hermanu d'Urraca- agradez al Obispu d'Uviéu qu'amatagara la sublevación. 

Valió-y aquel intentu d'independencia por que munches publicaciones la recuerden como una muyer valiente y rebeyuda. Anque otres escaécenla cuando repasen a les primeres feministes de la Hestoria. Ello ye, que cuando finó embalsamáronla al estilu exipciu y la so tumba puede visitase na catedral de Palencia. Lo dicho, esta xente diba llevar tolos "Trending topic".