Mieres acueye una retrospectiva de la pintora uvieína Monica Dixon

La pintora uvieína Mónica Dixon (1971) amuesa una faceta casi desconocida nuna esposición nel Institutu Bernaldo de Quirós de Mieres, una institución educativa onde s'imparte'l bachiller artísticu y qu'alluga un auténticu muséu d'arte contemporáneo, con pieces de los meyores creadores españoles y asturianos del sieglu pasáu y l'actual. Hasta el próximu día 31 de mayu va poder contemplase “Round-trip journey”, un viaxe pictóricu d'ida y vuelta, una pequeña retrospectiva de tola obra de Dixon dende 2007 y hasta l'actualidá. Va haber 12 pieces de gran formatu, pero tamién dibuxos bocetos y, inclusive, dalguna escultura. Dalguna d'estes pieces nunca s'enseñaren hasta agora.

Mónica Dixon ye una pintora que, na práctica, abulten ser dos. Dos llinies temátiques perbién definíes marquen la so obra actual. Per un llau, tán les sos característiques cases, paisaxes desnudos habitaos namás por viviendes d'aire norteamericanu, un ecu hopperiano de la infancia y mocedá qu'esta pintora de padre estadounidense y madre uvieína pasó en Nueva Jerséi. La otra llinia creativa de Mónica Dixon trescurre de puertes p'adientro: pintures d'interiores esenciales onde la lluz fai esquina col vacíu.

Dende va venti años, tal que esplica Mónica Dixon, estes dos llinies fueron desenvolviéndose en paralelo. Les cases falen de la so condición doble, como asturiana y estadounidense. El primer “cimientu” d'eses viviendes solitaries y alloñaes de cualesquier otru signu de civilización fueron les semeyes que Dixo tomó nun viaxe pela zona de Lancaster (Pennsylvania), un espaciu de “inmenses llaneres y praderíes”. Les primeres cases surdieron d'aquelles imaxes, “pero lo de les fotografías nun duró muncho por qu'empecé a inventame les cases, conociendo bien l'arquitectura de la mio zona –New Jerséi , Pennsylvania- y posándoles sobre un paisaxe metafísicu”, esplica Dixon. Los cuadros d'eses cases lleven nomes de llugares reales “pero si vas ellí nun vas atopar esi paisaxe con esa casa”, amesta.

Los primeros interiores que Dixon pintó, dempués de dir buscando la so voz pictórica al traviés d'otros temes como retratos, bodegones o paisaxes, fueron los de la so propia casa n'Uviéu, “que daba llugar a la inspiración por tratase d'un pisu antiguu”. Aquellos interiores teníen, inda, dalgún mueble, inclusive dalguna figura humana, “pero nun tardé n'afayar que m'empezaben a estorbar oxetos, muebles y lo que más d'interesaba yera la simple lluz que se peñeraba al traviés del esterior y les solombres del propiu interior, en contraste con aquella lluz”. Güei, nesi camín hacia'l “vaciamientu” del espaciu llegó al puntu nel que güei s'alcuentra: fai les sos propies construcciones pa estudiar la lluz dende enfoques distintos y depués pásales al llenzu.

Pero la expo del Institutu Bernaldo de Quirós tamién va regalar al visitante delles sorpreses. Visto que se trata d'un centru educativu onde se formen los artistes plásticos del mañana, Dixon quixo enseñar tamién bocetos, dibuxos a carboncillu, un autorretratu.... Dalgunos d'ellos son de la so dómina d'institutu por que los mesmos alumnos del centru vean qué taba faciendo Dixon cuando tenía más o menos la edá de los alumnos del institutu. Ye un detalle pa col llabor d'un centru educativu “que ye realmente increíble tanto pola coleición que tienen como pol llabor que fai”. Na esposición tamién va poder contemplase una de les escultures de cases que la pintora uvieína fai con materiales reciclaos, un aspeutu de la so obra apenes conocíu hasta agora. L'horariu de visita de la muestra ye, de llunes a vienres, de 10 a 14 hores y de 17 a 20 hores.