El marketing llamalos Dink, pero son pareyes ensin fíos y con dos sueldos: asina ye'l modelu de familia que nun dexa de crecer n'Asturies

Estes pareyes son el 15% de los llares españoles, según datos de 2022, y van creciendo

Nel Principáu'l 5,5% d'elles son menores de 35 años y el 10,9% mayores d'esa edá 

Dink n'Asturies: Dos persones, dos sueldos, cero fíos

Dink n'Asturies: Dos persones, dos sueldos, cero fíos / LNE

Sixto Cortina (Traducción)

Son pareyes ensin fíos y con dos sueldos y el marketing llamalos Dink a partir del acrónimu n'inglés (Dual Income Non Kids). Según los datos de 2022, el 15% de los llares españoles son Dink. Al mercáu de los productos y de les esperiencies encánten-yos porque tienen más dineru y menos gastos y obligaciones. Dink namás ye'l nome que da la mercadotecnia a lo que s'enunció equí como "tienen dos sueldos, nun tienen fíos ¿Qué problema tienen?". Nesi tener o nun tener xeneralízase enforma, pero entiéndese. 

Crecen na sociedá dende 2019 por un amiestu de demografía, valores sociales y posibilidaes económiques. La llende d'edá d'esta población diana del mercáu son los 64 años. Puede entrase de mayor por convertise n'unidá de convivencia a edá avanzada o porque esi "non kids" refierse a fíos al cargu y si se tienen lluego ya independícense ceo, una pareya puede espertase convertida en Dink. N'Asturies el 5,5% de les pareyes son Dinks menores de 35 años y el 10,9, mayores de 35. Asina pasa polo xeneral n'España. Del 15% de les families Dink namás 4 de cada 10 tienen menos de 35 años.

Asturies anda per detrás d'Estremadura, onde representen un 18 % del total, de Cantabria, con un 16,7 %, Galicia, La Rioxa y Aragón. Madrid ye de les provincies que menos tien (13,5%)