Empiecen les visites al Castiellu de Gauzón, que se van allargar hasta setiembre

Empieza la temporada nel Castiellu de Gauzón. La empresa Castrum yá entamó les visites empobinaes gratuites al yacimientu arqueolóxicu, onde yá ente finales del sieglu VI y el sieglu VII hai documentada una primer ocupación, inclusive primero d'aniciar el Reinu d'Asturies. La hora d'entamu del percorríu va ser a les 17.00 hores nos xueves del mes de xunu. Amás, nos vienres y sábados va haber sesión doble, con visites a les 12.00 y a les 17.00 hores. L'horariu va ampliase nos meses de xunetu y agostu yá que pelos xueves va haber tamién sesión mañanera. En septiembre, el sistema de visites va ser asemeyáu al que yá entamó y va permanecer a lo llargo de tou xunu.

Sía que non, les visites van ser gratuites pero van pidir que s'acute plaza. Les persones interesaes en viaxar nel tiempu y remontase a los tiempos de los Reis asturianos tendrán de facelo al traviés d'una llamada telefónica o col unvíu d'un Whatsapp al númberu 646846108. Los percorríos tienen una duración d'una hora y media aprosimao y lleguen dempués de la puesta a puntu de la zona d'escavaciones.

Esta iniciativa axúntase a les visites que yá se veníen faciendo a lo llargo de tol mes de mayu al Monesteriu de Raíces. El monesteriu y el yacimientu formen parte del denomináu complexu hestóricu de Raíces Nuevo.

Les primeres escavaciones nel yacimientu del Castiellu de Gauzón empezaron en 2007 basándose nos trabayos que nos años setenta protagonizara Vicente José González García. Llueu llegaron los primeros afayos: la entrada al recintu amuralláu, que taba defendíu por una entrada monumental protexía por dos grandes torrexones. Quiciabes ún de los finxos d'esta escavación arqueolóxica foi en 2014 cuando los especialistes alcontraron el taller onde foi ellaborada la Cruz de la Victoria allá pel añu 908. Ún de los últimos afayos foi una trente de Recaredo I, rei visigodu , qu'agora lluz nel Muséu Arqueolóxicu.

“Cola ayuda del Gobiernu del Principáu d´Asturies”.