ArcelorMittal alíase con Materialise pa la impresión 3D con polvu d'aceru n'Avilés

La compañía belga ye ún de los líderes mundiales en tecnoloxía de fabricación aditiva

Xasis moto ellaboráu con polvu d'aceru d'ArcelorMittal.

Xasis moto ellaboráu con polvu d'aceru d'ArcelorMittal. / LNE

Sixto Cortina (Traducción)

ArcelorMittal Powders, la nueva unidá de negociu de la multinacional siderúrxica pa producir polvos d'aceru d'alta calidá n'Avilés, alióse cola compañía belga Materialise, ún de los líderes mundiales en software y servicios d'impresión 3D, pa desenvolver tecnoloxíes de fabricación aditiva pa la producción de pieces metáliques más rápides y rentables.

Les dos compañíes firmaron un memorando d'entendimientu (MOU), que fixeron públicu va unos díes. "La collaboración con Materialise sofita la nuesa visión de que la clave del ésitu na fabricación aditiva ye atopar la combinación afayaíza d'instrucciones dixitales y polvos d'aceru pa ufiertar el meyor equilibriu ente calidá y productividá", esplicó Aubin Defer, director de marketing d'ArcelorMittal Powders. "Esta asociación avéranos a un futuru nel que la impresión 3D va algamar el so máximu potencial, permitiendo tanto la personalización masiva como la producción a gran escala", afirmó Udo Eberlein, vicepresidente de software de Materialise.

ArcelorMittal centralizó n'Avilés, cola instalación d'un atomizador a escala industrial, el so apueste pola producción verde d'aceru en polvu d'alta calidá que se va utilizar pa la fabricación de pieces y componentes pa sectores como'l del automóvil, l'aeroespacial, el del armamentu o el del equipamientu médicu, ente otros.

L'alianza con Materialise va permitir a ArcelorMittal Powders utilizar el procesador de construcción d'ultima xeneración que ta desarrollando la compañía belga cola gama de polvos d'aceru que se producen n'Avilés p'ameyorar la LPBF, la tecnoloxía de fabricación aditiva más utilizada pa producir pieces metáliques. Los procesadores de construcción venceyen les impresores 3D col software de preparación de datos, entainando'l procesu de fabricación aditiva dende'l diseñu hasta la impresión. El procesador de construcción de nueva xeneración de Materialise que va utilizar ArcelorMittal Powders almite volumes de construcción más grandes y xeometríes más complexes que los procesadores de construcción tradicionales.

“Cola ayuda del Gobiernu del Principáu d´Asturies”.