El grupu Central Llechera Asturiana ganó 26,3 millones en 2023, una cifra récord

La facturación del conxuntu de sociedaes, con unos resultaos que lidera la filial Capsa, entrepasó per primer vegada los 1.000 millones d'euros

Conceyu de socios de Central Llechera Asturiana, va unos díes, en Granda (Siero).

Conceyu de socios de Central Llechera Asturiana, va unos díes, en Granda (Siero). / CLA

Sixto Cortina (Traducción)

El grupu Central Llechera Asturiana (Clas) llogró l'añu pasáu un beneficiu de 26,3 millones d'euros, el mayor de la hestoria de la organización, con una facturación que per primer vegada entrepasó los 1.000 millones. Los resultaos del grupu inclúin los de la compañía matriz (la sociedá agraria de tresformación Central Llechera Asturiana ) y los de los sos filiales, que les dos principales son Capsa (la fabricante del productos lácteos) y Rusti (productora y comercializadora de piensos, granes, forraxes y abonos).

El grupu incrementó'l so volume de negociu'l 8,39%: pasó de los 973 millones de 2022 a 1.054,7 millones en 2023. Ye'l sestu exerciciu consecutivu d'aumentu de los ingresos, anque nos trés últimos años esta elevación de la facturación nun foi namás por aciu de la meyora de les ventes sinón tamién pol efeutu inflacionariu. La inflación tuvo un efectu perversu en 2021 y 2022 na cuenta de resultaos, con un esbarrumbe de los beneficios, que pasaron de 18,6 millones en 2020 a namás 1,8 millones en 2022 al nun repercutir tolos costos nel preciu de venta. La moderación inflacionaria dexó agora normalizar la rentabilidá, con un beneficiu netu de 26,3 millones. Hasta agora'l meyor resultáu llográrase en 2018 con 23,76 millones.

El gruesu d'esti beneficiu apurriólu CAPSA. El grupu nun sopelexó la resultancia d'esta sociedá (la más importante de la organización), anque anda contiando la cifra total del grupu. Ye'l mayor beneficiu dende los 25,1 millones de 2020. Capsa facturó 968,5 millones, el 8% más y afitó tamién con ello un récord d'ingresos. Les cifres de Capsa namás inclúin la metá de les ventes de la so filial La Flor de Burgos, por cuenta de qu'esta compañía nun pasó a ser 100% de Capsa hasta l´ultimu 27 d'avientu.

Repartu ente socios

La cooperativa Clas (la sociedá cabecera y titular del grupu) tuvo una facturación de 238,4 millones d'euros pola venta de lleche a Capsa más los ingresos pol arriendu de la marca Central Llechera Asturiana a la filial y los dividendos llograos de les sos participaes. El beneficiu de la sociedá agraria de tresformación xubió a 4,421 millones, el 38% más, y llogró un récord de ganancies en rexistrando descensos en 2021 y 2022. De los beneficios de la sociedá agraria de tresformación Clas, el 22% (992.000 euros) van repartise ente los socios como ganancies sociales y otru 4,78% (más de 211.000 euros) como intereses del capital. 

El censu total de socios (6.594 al zarru de 2023) prosigue la so cayida, mesmo que'l grupu de los que siguen apurriendo lleche: 825 al términu del añu pasáu. Una encuesta ente los socios dio, nuna escala de 1 a 7, una satisfaición de 6,9 na xeneración de los socios fundadores, de 6,2 nos de segunda xeneración y de 6,3 na tercera. 

Nel casu d'ASA, el so volume de negociu entrepasó los 80 millones d'euros, el 8% más qu'en 2022. El grupu nun dio información del resultáu netu d'esta sociedá. 

Les resultancies del grupu fueron aprobaos esti día pol conceyu de socios de Central Llechera Asturiana con un sofitu del 79,5% de los votos.

“Cola ayuda del Gobiernu del Principáu d´Asturies”.