Los 91 puestos de trabayu nuevos que va crear l'Alministración n'Asturies

El Principáu autoriza un gastu de 18,5 millones pa planes d'empléu

Edificiu alministrativu del Principau d'Asturies n'Uviéu.

Edificiu alministrativu del Principau d'Asturies n'Uviéu. / Miki López

Sixto Cortina (Traducción)

El Conseyu de Gobiernu autorizó va unos díes en Pravia una reestructuración de los puestos de trabayu de l'alministración, qu'inclúi la creación de 91 y el cambiu de 600. Estos cambios van afectar particularmente a les xefatures de serviciu y niveles inferiores y busquen dar respuesta a les necesidaes prioritaries de personal. 

Amás, tamién anunció un gastu pluriañal de 18,5 millones d'euros pa subvencionar dos iniciatives del Serviciu Públicu d'Empléu y qu'entamen los Conceyos: los planes locales d'empléu y les práctiques llaborales de mozos en puestos afayaízos al so nivel d'estudios. 

Ente otres novedaes, según informó'l Principáu, rescampla la "reconocencia de turnicidá y nocturnidá pa 60 puestos del Serviciu d'Emerxencies del Principáu", amás del refuerzu en delles árees. 

Ente otres: Turismu (refuerzu na inspección), Discapacidá (créase una xefatura de sección), Intervención Xeneral (dos nuevos puestos pa entainar la tramitación d'espedientes), Ordenación de Territoriu (créense puestos en Memoria Democrática y Axenda 2030 y refuerzu de la Secretaría Xeneral), Ciencia (nuevos puestos pal emprendimientu y la estructura orgánica de l'Axencia Sekuens), Educación (nuevos puestos venceyaos a la integración de les escuelines), Mediu Rural (refuerzu nos servicios de Montes), Derechos Sociales (puestos en direcciones xenerales) y Cultura (Dotación d'una Secretaría Xeneral Técnica). 

Al empar, el Conseyu de Gobiernu tamién autorizó un gastu total de 5.508.332 euros pa obres de meyora de delles carreteres nos conceyos de Llanera, Illas, Castrillón, Siero, Allande y Cangas y la compra de maquinaria pa estos trabayos.

“Cola ayuda del Gobiernu del Principáu d´Asturies”.