Abierta la matrícula pa la Universidá Asturiana de Branu

Academia de la Llingua Asturiana

Academia de la Llingua Asturiana / LNE

EP

La Universidá Asturiana de Branu (Uabra), que va incluyir na ufierta lectiva d'esti añu un cursu sobre'l feminismu n'Asturies y otru sobre l'entornu natural del Conceyu de Casu como recursu didácticu, yá abrió la matrícula.

La Uabra va celebrase n'El Campu (Casu) ente'l 29 de xunetu y el 9 d'agostu y, amás de los cursos d'asturianu de dos selmanes de duración -elemental y avanzáu-, va acoyer los d'Afondamientu Cultural y Llingüísticu, d'una selmana de duración, dedicaos a materies concretes.

Nesta ocasión, na primer selmana va haber el tradicional cursu de tradución con otru tituláu 'Feminismu, sociedá y futuru n'Asturies', dirixíu a les persones interesaes en conocer, analizar y reflexonar alredor de la espresión social, cultural y política de los feminismos n'Asturies. Marta Mori, Laura Marcos, Cristina Valdés, Margarita Fernández Mier, Beatriz Redondo Viado, Ángeles Carbajal o Sofía Castañón van ser dalgunes de les encargaes de poner clase.

Per otru llau, na segunda selmana de la Uabra va haber un cursu sobre 'L'entornu natural del Conceyu de Casu como recursu didácticu' y otru de 'Creación lliteraria n'asturianu'. Otra manera, n'A Caridá (El Franco) va celebrase la primer fase del cursu de capacitación docente en gallego-asturianu, que va ser del 29 de xunetu al 9 d'agostu.

“Cola ayuda del Gobiernu del Principáu d´Asturies”.