La inflación repica n'Asturies, pero sigue siendo la quinta más baxa d'España

L'IPC, nel 3,5%, ye'l más altu dende marzu

La eletricidá lidera l'alza, siguida por hostelería

L'alimentación baxa 0,8 puntos

La inflación repica n'Asturies, pero sigue siendo la quinta más baxa d'España

La inflación repica n'Asturies, pero sigue siendo la quinta más baxa d'España / LNE

Sixto Cortina (Traducción)

La inflación xubió n'Asturies dos décimes en mayu en tasa interañal (una menos de lo qu'asocedió nel conxuntu del país) y asitió nel 3,5%, la más elevada dende marzu. Magar esta medría (la tercera consecutiva), l'índiz de precios de consumu (IPC) caltiense na rexón una décima per debaxo del promediu español (3,6%) y asitia a Asturies como la quinta comunidá col menor costu de la cesta de la compra. La tasa d'inflación, que tien un efectu acumulativu sobre los precios, caltiense llueñe del máximu alcanzáu en xunetu de 2022, cuando l'IPC asturianu crecía a tases interañales del 11,1%. 

Na medría esperimentada pol costu de la vida'l mes pasáu influyeron el comportamientu de delles tribes de productos y tamién un efectu puramente estadísticu al establecese la comparanza interañal col datu de mayu del añu pasáu, que foi un mes mui benignu, nel que' l'IPC asturianu cayó de sópitu 1,1 puntos: dende'l 4% que rexistrara n'abril de 2023 al 2,9%.

L'alza de dos décimes el mes pasáu foi posible magar que los precios de los alimentos se desaceleraron 0,8 puntos y asitiaron el so encarecimientu añal promediu nel 4%, entá eleváu, pero'l menor dende payares de 2021 y cuatro décimes inferior a la inflación alimentaria española.

Los alimentos siguen siendo'l cuartu epígrafe más inflacionariu nel Principáu, per detrás de los gastos venceyaos a la vivienda –qu'esperimentaron el mes pasáu una xuba interañal del 5,3% especialmente por aciu de la eletricidá en comparanza añal pol so descensu un añu primero–; restaurantes y hoteles (4,6%), y otros bienes y servicios (4,5%). Sígenlos tresporte (3,8%), bébores alcohóliques y tabacu (3,7%) y ociu y cultura (3,3%).

Aceite

Por productos individuales, el que más s'encareció nos últimos doce meses ye l'aceite (40,6%), anque en mayu concedió la so primer tregua dende avientu, con un retrocesu mensual del 4,2% al respeutive d'abril. Les frutes fresques (14,2%), carne de vacunu (9,8%) y pexe fresco y conxelao (9,2%) son los otros bienes de consumu más alcistes n'Asturies nun añu. Los que más s'abarataron nel acumuláu de doce meses son les frutes en conserva (-11,7%) y los testiles y accesorios pal llar (-4,7%). 

Les rexones cola inflación más disparada son Galicia (4,0%) y País Vascu (3,9%). Cantabria y Castiella y Lleón, llindantes con Asturies –mesmo que Galicia–, dieron la mesma tasa que'l Principáu: 3,5%. La comunidá menos inflacionaria ye Canaries, con un índiz del 3,4%, una décima menos que l'IPC asturianu.

“Cola ayuda del Gobiernu del Principáu d´Asturies”.