Aumenten en mayu un 48% los viaxeros en turismu rural, un 7% no que va d'añu

La cifra d'usuarios d'agospiamientos rurales sextuplicóse no que va de sieglu, un crecimientu que va al empar del datu nos apartamentos turísticos

Aumenten los viaxeros en turismu rural

Aumenten los viaxeros en turismu rural / LNE

Sixto Cortina (Traducción)

Asturies incrementó'l pasáu mes de mayu un 48% el númberu de viaxeros que se quedaron n'establecimientos de turismu rural, al pasar de los 17.617 rexistraos en mayu del añu pasáu a los 26.134 del mesmu mes en 2024. Ye'l mayor crecimientu interañal por modalidaes d'agospiamientos turísticos, siguíu de la medría nun 11 por cientu de los viaxeros que se quedaron n'hoteles. Crecieron un 4% los agospiaos en cámpings, pero baxó un 29% la cifra de viaxeros n'apartamentos turísticos y un 9% el de los que se quedaron n'albergues. 

Con too y con ello, les cifres nel total de los cinco primeros meses del añu p'Asturies apenes variaron al respeutive del añu anterior: tocantes a viaxeros sí aumentó la cifra nos hoteles (al pasar de 592.851 a 638.201), pero menguó en cámpings, apartamentos turísticos y albergues. Aumentó nel turismu rural, pasando de 72.733 a 77.335 nos cinco primeros meses. El crecimientu de viaxeros en turismu rural en mayu sucedió en tolos perfiles. Los turistes procedentes del estranxeru aumentaron nos agospiamientos de turismu rural y crecieron un 47,6%, medrando de los 3.678 rexistraos en mayu de 2023 a los 5.430 del mesmu mes nesti añu. 

El dinamismu del sector turísticu n'Asturies rescampla si s'analiza la evolución de viaxeros y pernoctaciones dende l'añu 2000. En toles modalidaes el crecimientu foi sosteníu, magar nos viaxeros n'hoteles percíbese un descensu nos últimos años. El máximu rexistráu producióse n'agostu de 2019, con 287.000 viaxeros rexistraos n'hoteles, pero n'agostu del pasáu añu la cifra quedó en 272.000. Nel mesmu mes en 2001, sicasí, los viaxeros andaben alredor de los 177.000.

Más acusáu foi l'aumentu nel turismu rural, qu'algamó'l máximu de viaxeros n'agostu del pasáu añu, con 65.406, pero a principios de sieglu, nel mesmu mes, esta cifra apenes llegaba a los 11.500. Esto ye, casi se multiplicó por seis la cifra de viaxeros. 

Na modalidá d'apartamentos turísticos (distintu de les viviendes d'usu turísticu qu'agora se pretenden regular), l'aumentu foi hermanu, pasando de los 5.317 n'agostu de 2001 a los 23.366 nel mesmu mes de 2023. 

Eses medríes nun computen a los viaxeros qu'utilizaron viviendes d'usu turísticu, que queden fuera de la estadística. Según l'INE n'Asturies esisten unes 7.240 viviendes que s'arrienden dacuando a turistes.

“Cola ayuda del Gobiernu del Principáu d´Asturies”.