Les visites empobinaes a la Rula d'Avilés, una ufierta turística d'ésitu pa conocer meyor la vida del mar

Los percorríos fadránse los martes y los vienres, del 5 de xunetu al 6 de setiembre 

Iván Miguel / Sixto Cortina (Traducción)

"Una de les ufiertes del turismu de mayor ésitu n'Avilés". Asina definió la conceyala de Turismu, Raquel Ruiz a les visites empobinaes a la rula avilesina qu'aporta yá a la so décimo cuarta edición.

Una de les novedaes, ye qu'esti añu l'actividá va tar empobinada por personal esperto de la Rula d'Avilés, onde per aciu d'un paséu peles instalaciones podrá conocese'l procesu y tránsitu del pescáu, amás de poder presenciar cómo se realiza la puya del pescáu. Ramón Álvarez, xerente de la sociedá Nueva Rula d'Avilés S.A . sorrayo "tenemos una marca de calidá propia que nun la tien naide, namás que la Rula d'Avilés". Álvarez entiende qu'alredor d'esa marca de calidá entamóse una manera de trabayar que ye la envidia d'otres rules.

De magar se punxeron en marcha estes visites nel añu 2010, yá son alredor de 11.000 persones les que vivieron esta inicativa de turismu d'esperiencies, que namás s'atayó nuna edición como consencuencia de la pandemia derivada de la COVID 19. Con esta iniciaiva, pretende proxectase la importancia de la Ría d'Avilés y el mundu de la pesca, munches vegaes ignoráu dende'l conocimientu como aseguró Álvarez.

Por aciu de les visites, Ruiz señala que "ye una forma d'enseñar la nuesa identidá, de lo que somos y tamién de lo que naguamos a ser". Con esta iniciativa búscase tamién la promoción de los productos locales, ente los que'l pescáu de la rula avilesina cuenta con un Distintivu d'Enfotu qu'acredita la so calidá.

Les visites van ser de calter gratuitu, y vienen faciéndose dende'l vienres 5 de xunetu, van tener una duración aprosimao d'hora y media y va ser imprescindible acutar con anterioridá, por cuenta de que l'aforu máximu de cada visita va ser de 18 persones. La reserva puede facese de manera presencial na Oficina de Turismu d'Avilés. Tamién puede acutase plaza al traviés del teléfonu 985 544 325 y del corréu electrónicu @turism@aviles.es.

“Cola ayuda del Gobiernu del Principáu d´Asturies”.