Cultura entama un festival con siete díes de música y teatru pol milenariu del Monesteriu de Corniana

Programa del festival.

Programa del festival. / Gobiernu d'Asturies

EP

La Conseyería de Cultura, Política Llingüística y Deporte entamó en Corniana un festival cultural pa celebrar el milenariu de la fundación del Monesteriu de San Salvador. Dende'l llunes 8 de xunetu y a lo llargo de siete díes, Cultura tien programaes actividaes alredor de la música, el teatru y el baille que setan celebrando na rodiada del propiu complexu monásticu.

El principiu del festival cultural marcólu la Banda de Gaites de la Villa de Salas y Paulino Santirso, que dieron un conciertu y un taller de baille’l llunes 8 de xunetu. El martes foi'l turnu de les artes escéniques cola interpretación de la obra teatral Apestosos pero sabrosos, de David Acera, na esplanada del monesteriu.

La tarde d'esti miércoles 10, Elia Esipovich a los teclaos y Susana Gudin cola so voz van dar un conciertu llíricu na ilesia a les 20 hores. Al otru día, el xueves, va representase la obra El espectáculo más pequeño del mundo, d’Adrián Conde, a les 11 de la mañana na plaza de la Colexata Santa María la Mayor de Salas.

El vienres, les persones que s’averen al Monesteriu de San Salvador van poder disfrutar d’un espectáculu inmersivu anovador que va repartise en dos turnos, a les 19 y a les 22 hores.

20240703f8cc73d655b38cb29ad3d008fae48a10.jpg

Programa del festival. / GOBIERNO DE ASTURIAS

El platu fuerte va ser el sábadu 13 de xunetu con trés actividaes programaes dientro del festival cultural, onde tamién hai espaciu pa la canción asturiana con un conciertu de tonada. Va ser na ilesia del monesteriu al mediudía y nél van participar Reyes Menéndez, Manolo Becerrales, Marina Carbajosa, Aquilino Fernández y Xaime Menéndez a la gaita.

El mesmu sábadu, de tarde, va haber una exhibición d’esgrima y dos conciertos: ún del grupu Calea, compuestu por Silvia Quesada, Leticia Baselgas y Rubén Bada, y otru del Coru Villa de Salas y Belmonte de Miranda.

Les actividaes son gratuites y tán dirixíes a tolos públicos, tanto infantil como adulto y familiar, fomentando d’esta manera una ufierta cultural de calidá y accesible, nesti casu, dende’l conceyu de Salas.

“Cola ayuda del Gobiernu del Principáu d´Asturies”.