L'efectu que la minería inda tien (cuasi seis años depués del zarru de los pozos) nes pensiones de los asturianos

El Principáu ye l'autonomía con mayor tasa de población de más de 50 años que cobra pagues de xubilación por cuenta de los retiros antemanaos del carbón

La minería asturiana entá pesa nes pensiones

La minería asturiana entá pesa nes pensiones / LNE

Sixto Cortina (Traducción)

Na llábana de la minería asturiana del carbón figura la fecha del 31 d'avientu de 2018. Yera'l tope de vida qu'afitara la Comisión Europea pa les esplotaciones mineres que recibieren ayudes a la producción. Seis años depués, n'Asturies namás queda l'actividá residual del pozu San Nicolás d'Hunosa, venceyáu a la central térmica de La Pereda, y 885 trabayadores daos d'alta na Seguridá Social nel réxime especial del carbón. Sicasí, la mina sigue teniendo munchu pesu nes pensiones. Nótase nel importe mediu, porque los pensionistes asturianos son, depués de los vascos, los que reciben les pagues más altes (con una media de 1.465 euros al mes) y, sobremanera, nótase nes xubilaciones antemanaes. 

L'Institutu Nacional d'Estadística (INE) acaba de publicar el módulu sobre pensiones y participación nel mercáu llaboral correspondiente a 2023 de la Encuesta de Población Activa (EPA). Nesi módulu analiza la población qu'en 2023 tenía ente 50 y 74 años pa comprobar l'efectu de les xubilaciones antemanaes o de los retrasos na edá de xubilación sobre'l cobru de pensiones. 

Asturies tenía l'añu pasáu 391.600 persones d'ente 50 y 74 años y d'ellos, según la encuesta del INE, 121.900 recibieron dalguna pensión de xubilación. El porcentaxe ye del 32,30%, la tasa más alta ente toles comunidaes autónomes y ocho puntos más que la media n'España, que ye del 24,15%. La tases más arimaes a la d'Asturies son les de País Vascu (28,93%) y La Rioxa (28,22%), y hai comunidaes autónomes que nun lleguen nin al 20%, como ye'l casu de Canaries (19,53%) y d'Estremadura (19,59%).

Les altes tases de pensionistes na población d'ente 50 y 74 años d'Asturies tien que ver col pesu que tenía la minería del carbón y a les xubilaciones antemanaes a les qu'aportaron los sos trabayadores. 

Hai que tener en cuenta que nun ye lo mesmo una prexubilación –a la que s'acoyeron tamién miles de mineros n'Asturies colos planes d'axuste del sector– qu'una xubilación antemanada. Nel primer casu ye un alcuerdu ente empresa y trabayador que ye ayenu al Sistema de Seguridá Social y pol mor del que l'emplegáu pasa a ser paráu con derechu a prestación de desempléu –si cumple los requisitos pa ello– y amás puede cobrar un porcentaxe del so salariu habitual. Pela so parte la xubilación antemanada ye la posibilidá de cualquier trabayador –que cumpla una serie de requisitos– de percibir una pensión pública de xubilación primero de la edá llegal de xubilación (qu'en 2023 yera de 66 años y 8 meses pa los que cotizaren menos de 38 años y 3 meses y de 65 años pa los que cotizaren más).

Coeficientes reductores

La edá de xubilación antemanada puede ser rebaxada naquellos grupos o actividaes profesionales nos que los sos trabayos sían de naturaleza escepcionalmente penosa, peligrosa, tóxica o insalubre y acusen elevaos índices de mortalidá. Ye'l casu de la minería, qu'a los sos trabayadores aplíquense-yos coeficientes reductores –en función del tiempu efeutivamente trabayáu y de les categoríes y de les especialidaes profesionales– que nun pueden dar llugar a que'l trabayador pueda aportar a la pensión de xubilación con edá inferior a 52 años. Pero nel casu de los trabayadores del réxime especial de la minería del carbón esa llende inclusive puede superase. 

El pesu que tenía la minería del carbón n'Asturies provocó que la tasa de xubilaciones antemanaes fora peralta y eso entá se nota nes estadístiques del INE qu'analicen el cobru de pensiones de xubilación ente los 50 y los 74 años. Asturies rescampla por una actividá que yá ye pasáu.

“Cola ayuda del Gobiernu del Principáu d´Asturies”.