El yate asturianu del fundador de WhatsApp: l'últimu barcu de luxu fabricáu pol grupu Armón ye propiedá del ucranianu Jan Koum

El ruiu d'un helicópteru bimotor Airbus ruempe'l silenciu nuna de les sableres menos accesibles de los cantiles de la Mola, na isla de Formentera. L'aeronave maniobra con decisión y pósase ensin tatexos sobre la plataforma d'un espectacular yate. La embarcación ye "Nebula", l'últimu barcu de luxu fabricáu pol constructor naval asturianu Armón. Y el que se baxa del helicópteru ye'l dueñu del yate, l'ucranianu Jan Koum, cofundador WhatsApp y una de les cien mayores fortunes d'Estaos Xuníos –país nel que llogró la nacionalidá– en vendiendo a Facebook l'aplicación de mensaxería por más de 20.000 millones d'euros.

Na compra de "Nebula", Koum gastó alredor de 40 millones d'euros, pero lo más ablucante ye qu'esta embarcación de más de 68 metros d'eslora nun ye'l yate nel que pasa les sos vacaciones na mar. En realidá ye una embarcación de sofitu del megayate "Moonrise", el llar flotante del millonariu que nes últimes selmanes tamién se dexó ver peles Isles Baleares.

"Nebula" ye'l tercer "shadow cat" fabricáu por Armón. Con esti términu inglés denomínenese les embarcaciones destinaes a dar servicios a yates de superluxu. Primero que "Nébula", el grupu de construcción naval con sede en Navia fabricó'l "Hodor" pal italu-estadounidense Lorenzo Fertitta –empresariu de casinos y promotor d'espectáculos deportivos qu'engrandó la so fortuna cola compraventa de la Ultimate Fighting Championship (UFC), el campeonatu de llucha estrema– y el "Wayfinder" pal magnate empresarial estadounidense Bill Gates –cofundador de Microsoft–. Armón atopó nestos caprichos de millonarios un nuevu nichu de negociu.

"Nebula" ye un catamarán d'aluminiu que s'utiliza principalmente como intercambiador, como ponte ente'l tresporte aéreu y el luxu del megayate nodriza. Tien helipuertu y hangar pa guarecer l'aeronave ensin necesidá de plegar les pales del rotor, colo que siempre ta llista pa volar. So la cubierta principal cuenta con un espaciu de 400 metros cuadraos p'agospiar un catamarán ausiliar de 12 metros d'eslora, dos llanches neumátiques y cuatro motos acuátiques. Si'l propietariu decide quedase temporalmente nel yate tien una suite. El barcu tien capacidá pa 32 pasaxeros (20 de tripulación) y, amás de camarotes y servicios comunes como cocina, comedor y sales de xuntes, dispon de dos ximnasios y cine.

“Cola ayuda del Gobiernu del Principáu d´Asturies”.