Asina se bebe del "grifu" d'Asturies: Arcelor y Xixón consumen la metá del agua de los pantanos de Tañes y Rusecu

Los pantanos de Tañes y Rusecu, en Casu y Sobrescobiu, son calificaos munches vegaes como "el grifu d'Asturies". Pero, ¿hasta qué puntu ye esto cierto? La Memoria Añal de Cadasa, el Consorciu d'Agües del Principáu d'Asturies, esclarialo con datos: el 98% del agua que porporciona a los 36 conceyos consorciaos sal d'esti complexu, formáu polos dos pantanos y la potabilizadora d'agua de Comiyera. Según l'informe, amás, el consumu d'agua n'Asturies aumentó'l pasáu 2023 en 847.338 metros cúbicos, prácticamente un "Bernabéu" d'agua. Esta medría supon un crecimientu del 1,5% añal. 

El principal consumidor d'esti agua que sal del parque natural de Redes nun son los vecinos d'un conceyu asturianu. Ye una instalación industrial. Ye la factoría d'Arcelor en Veriña, que bebe'l 23% de tol agua potabilizada por Cadasa: 13,13 millones de metros cúbicos, de los 56,14 millones que suministró'l Consorciu al sistema de suministru asturianu l'añu pasáu. Otros grandes consumidores industriales d'agua potable son Asturiana de Zinc (1,99 millones de metros cúbicos), Central Llechera Asturiana (1,19) y Du Pont (0,96). 

Por conceyos, Xixón ye con diferencia'l Conceyu que más agua bebe del parque de Redes, con 12,4 millones de metros cúbicos. Una cantidá a la qu'hai qu'axuntar otru sistema de suministru propiu d'esti conceyu, la trayida d'agua de Los Arrudos, en Casu, xestionada pola EMA (Empresa Municipal d'Agües de Xixón). En 2021, los últimos datos disponibles, esta captación d'agua nes cercaníes de Caliao suministraba'l 31% de l'agua de la ciudá (Cadasa daba entós el 62%), lo que suponía 6.768.224 metros cúbicos. Bien per detrás del agua del parque de Redes nel suministru de Xixón (93% en total) quedaben el manantial de Llantones (3,76% del agua) y l'acuíferu Somió-Deva-Cabueñes (1,84%). 

Per detrás de Xixón, nel ranking de consumidores municipales asitia Siero, con 5,38 millones de metros cúbicos d'agua consumíos. Depués él, Uviéu (5,12 millones), qu'hai que recordar, saca lo más del agua pal so suministru d'otru pantanu de les Cuenques, nesti casu na del Caudal: el de los Alfilorios, en Morcín. Otros consumidores relevantes son Carreño (2,75 millones), Corvera (2,25) y Llanera (2,08). En resume, namás ente Xixón y Arcelor consúmese'l 45,6% de tol agua potabilizada por Cadasa. 

Colos datos na mano queda claro que l'altu Nalón ye, efectivamente, el grifu d'Asturies. Ensin l'agua que se capta nel parque natural de Redes, Arcelor tendría series dificultaes y unos 800.000 asturianos tendríen una trayida de condiciones peores enforma: l'agua de Casu y Sobrescobiu comparte la cualidá de ser d'alta calidá, de pidir pocu tratamientu pal so usu. Pero esti usu del altu Nalón pal suministru d'agua de tol centru de la rexón tien consecuencies. Esta forma d'asegurar la calidá torgó a lo llargo de munchos años l'usu lúdicu de los pantanos. Una circunstancia que camudó va unos meses, col entamu del usu de Tañes pal piragüismu federáu. Nunes selmanes va empezar tamién l'usu turísticu, con rutes en canoa. 

Per otru llau, la construcción de les preses nos años 70 anuló les vegues más granibles, y traxo la destrucción de delles actividaes económiques (fábrica de muebles, restaurantes, esplotaciones ganaderes). A manera de compensación, añalmente Cadasa financia una serie d'obres nos conceyos de Casu y Sobrescobiu. 

El 2% de l'agua de Cadasa que nun sal del Altu Nalón consíguese de la captación esistente nel pantanu de Arbón, en Navia. Dende equí suminístrense 1,06 millones de metros cúbicos a siete conceyos de la zona Occidental d'Asturies.

“Cola ayuda del Gobiernu del Principáu d´Asturies”.