Naz el premiu de canción asturiana "La Busdonga" entamáu pol Principáu

Les meyores voces de los participantes nos concursos de canción asturiana, en categoría masculina, femenina y moza, van poder optar a un nuevu premiu entamáu pol Principáu. Presentólu esti día la conseyera de Cultura, Vanessa Gutiérrez, na Llaboral, y lleva por nome Premiu d’Asturianada "Obdulia Álvarez La Busdonga". Gutiérrez defendió l'asturianada "como patrimoniu cultural", y ello ye que nel Gobiernu asturianu viérase "pernecesaria" esta iniciativa que partió de l'Asociación de Folclore Amigos de la Tradición (Afatra). Col galardón quier contribuyise a la pervivencia de l'asturianada, "non solo averándola a les nueves xeneraciones sinón tamién pa que más xente s'interese por ella". Gutiérrez destacó, amás, l'homenaxe qu'implícitamente se-y fae a La Busdonga, una pionera que superó estereotipos de la dómina. El concursu va desarrollase en dos fases y la primera van ser les semifinales, qu'empiecen el 10 de payares en Cangas del Narcea.

"Cola ayuda del Gobiernu del Principáu d'Asturies"