Estes son les dos ciudaes asturianes ente les trés (Lleón encabeza la llista) con menor población activa d'España

Avilés ye la segunda ciudá española –depués de Lleón– con menor tasa d'actividá –porcentaxe de la población n'edá de trabayar que tien empléu o lu busca– y Xixón, la tercera, según los datos espublizaos esti dá pol Institutu Nacional d'Estadística. Uviéu ocupa'l llugar decimocuartu. D'esta miente, les trés grandes urbes asturianes asitien ente les quince ciudaes españoles con menor fuerza llaboral, consecuencia de la debilidá demográfica, l'avieyamientu y l'éxodu. 

Asturies tamién ye la comunidá con menor tasa d'actividá del país. Anque meyoró nel últimu añu y mediu, caltiense nel 51,94%, 7,2 puntos per debaxo de la media nacional y 15,22 puntos per debaxo de Baleares, la rexón líder, según la última encuesta de población activa. Colos datos qu'esti día publicó l'INE, Avilés (51%) y Xixón (51,2%) asitien per debaxo del promediu asturianu na tamién denominada como tasa de participación y Uviéu (52,8%) supérala n'apenes 0,86 puntos. 

Avilés ta 18,9 puntos porcentuales per debaxo de Rivas-Vaciamadrid, la ciudá española que, con una tasa del 69,9%, lidera la población activa n'España. 

La fuerza llaboral –el continxente integráu polos ocupaos más los paraos que busquen empléu– ye un indicador perrelevante del potencial de crecimientu d'un espaciu económicu. 

N'Asturies vese torgáu por una pirámide demográfica esmolecedora. Nun ye casual qu'Avilés sía la segunda ciudá española –depués de Ferrol– cola edá mediana más elevada de la so población: 51,1 años. Xixón ye la sesta, con 50,3 años. Uviéu ye la decimoquinta, con 49 años. La mediana nun ye la media aritmética, sinón el valor que s'asitia de manera equidistante ente los estremos, de cuenta qu'hai tantos habitantes perriba d'esi nivel como per debaxo. El datu retrata una pirámide demográfica en procesu d'inversión. Nel estremu contrariu, Melilla tien la edá mediana más baxa d'España: 35,6 años. 

La mira futura nun ye esperanzadora, sacantes se rexistren fluxos d'inmigración o torna de población qu'emigrara. Xixón ye la quinta urbe del país con menor númberu de fíos por muyer (0,88) y Avilés ye la octava (0,96). Lorca (Murcia) lidera la tasa de natalidá con 1,61 fíos por muyer. Otra manera, Uviéu y Xixón y les sos zones d'influencia (árees urbanes funcionales) tán ente les de mayor renta del país: la d'Uviéu ye la novena con 15.616 euros de renta media añal por habitantes, y la de Xixón ye la decimosegunda, con 15.102 euros. Toles qu'encabecen la clasificación alcuentrense nel norte. 

La elevada posición de Xixón escuende situaciones desemeyaes nel so territoriu y área d'influencia. Esto esplica que la ciudá de Xixón concentre ochu barrios o distritos ente los 60 del país colos arriendos de vivienda urbana más amenorgaos. Son La Calzada, qu'ocupa el puestu 17.^u, per detrás de dieciséis barrios d'Alicante, Murcia, Valladolid, Córdoba, Zaragoza y Sevilla; Contrueces (puestu 21.^u), Pumarín (24.^u), Xove-Veriña-Tremañes (27.^u), Ciares (41.^u), El Natahoyo-Moreda (50.^u), El Llanu (55.^u) y Altu Pumarín (57.^u).

Pesu industrial y de servicios

Avilés y la so contorna persisten como l'área urbana española con mayor proporción d'empléu industrial: el sector fabril concentra'l 26% de los empleos de la zona. Xixón ocupa'l novenu llugar col 17,6%. L'área d'Uviéu destaca como la undécima d'España con mayor pesu de los servicios (suponen el 85,7% del empléu) mentanto qu'Avilés ye la zona urbana española que menor porcentaxe d'ocupaos tien nel sector terciariu (65,2%).

"Cola ayuda del Gobiernu del Principáu d'Asturies"