El Capitán Tremañes marcha d'aventura al Atenéu de La Calzada

L'ilustrador y escritor David Chánatos presenta'l vienres los sos últimos llibros nel centru municipal

El Capitán Tramañes.

El Capitán Tramañes.

Sixto Cortina (Traducción)

Xixonés de 1984, David Borrego ye David Chánatos o, a cencielles, Chánatos. Un apasionáu de los cómics que nun tardó en dar el saltu de lleelos a crealos. Primero dibuxó historietes, depués fixo animaciones usando'l so ordenador y el camín siguió cola edición de llibros pa mangar nes estanteríes del públicu xuvenil. Esti vienres, día 8, va tar nel Atenéu de La Calzada presentando los sos llibros "David Chánatos y sus amigos: seis años de condena" y "Las aventuras del Capitán Tremañes". La primera entemez misteriu, acción, aventura y ciencia-ficción y la segunda fai un chisgu al mundu de los superhéroes. El Capitán Tremañes ye'l protagonista d'una serie d'animación qu'entamó en 2006 en plataformes como YouTube y Vimeo y tuvo un papel secundariu na primer novela del mozu creador xixonés.

Primero de publicar en 2017 la so primer novela Chánatos yá estrenara un primer curtiumetraxe "La venganza de Michelle", de la que tamién hai una versión animada. En 2019, amás, debutó oficialmente como actor de doblaxe.

David Chánatos

David Chánatos / Marcos León

¿Y quién s'escuende detrás de la identidá del capitán Tremañes? La sinopsis del llibru afaya que se trata de Serafín, un mozu de 25 años que como superhéroe dedícase a combatir el crime y les fuerces del mal. La fonte de tolos sos poderes naz d'una esfera de cristal qu'atopó so padre na esploración d'una cueva. Pero "lo que menos abarruntaben tantu Serafín como'l so fiel amigu Roberto el "Motorilo" ye que la esfera diba dar más problemes de los qu'ellos pensaben, al haber unos alieníxenes procedentes del planeta del que vinieron esa y otres más, que son gafes pal cuerpu y alma. El destín del mundu ta nes manes del Capitán Tremañes, del so fiel aliáu l'Impresentable y dalgún qu'otru personaxe que va poder suponer una torga como el sobeyosu Seaboy. ¿Van ser quien ellos pa con enemigos tan desemeyaos como'l Desesperador, los Cuatro Antipáticos y Cara flan?". Pa saber la contestación a esta entruga hai que lleer el llibru.

"Cola ayuda del Gobiernu del Principáu d'Asturies"

Tracking Pixel Contents