El Memorial María Luisa lleva a Foncalada, n'Uviéu, el meyor cine de montaña

Va años que'l Memorial "María Luisa", l'esitosu Certame Internacional de Fotografía de Montaña, Naturaleza y Aventura que se convoca n'Asturies, tuvo qu'abrir tamién un apartáu de vídeu p'atender la gran producción de documentales d'esa temática que se facíen nel mundu. Y lo mesmo que pasó coles fotografíes, lo mesmo'l volume como la calidá de los trabayos enguedeyaron la selección al xuráu y a los organizadores. 

Pa ser xustos con esos grandes trabayos cinematográficos premiaos, que nun tienen una oportunidá tan bona pa enseñase como la que tienen les fotografíes ganadores en cada edición del certame, los organizadores del Memorial presentaron les primeres Xornaes de Cine de Montaña, Naturaleza y Aventura que se van a celebrar esti mes de payares (con ánimu de continuidá cada añu) nos cines Embajadores Foncalada d'Uviéu. 

Van ser cuatro sesiones abiertes al públicu interesáu, tolos xueves de payares (la primera esti mesmu xueves 7), nes que se van a ufiertar un total de 12 películes y documentales, combinando grandes producciones de cuasi una hora de duración con otres d'ente 5 y 10 minutos. "Teníemos una deuda colos vídeos", dicen dende la organización del certame, qu'amás quieren qu'a les proyeiciones s'axunten coloquios con direutores o téunicos, y tamién momentos d'alcuentru pa compartir esperiencies. Esti xueves les proyeiciones empiecen col documental francés "Zabardast" y el timelapse asturianu "Emoción Asturias. Las cuatro estaciones".

"Cola ayuda del Gobiernu del Principáu d'Asturies"