Esta ye, y asina se fixo, la semeya del faru d'Ortigueira que ganó'l maratón fotográficu de Cuaña

Una semeya vertical y en blancu y negru del icónicu faru d'Ortigueira resultó ganadora na décima edición del Maratón fotográficu de Cuaña. La imaxe ye obra del castrillonense Alejandro Ramírez y foi una de les 129 imaxes presentaes a esta cita que cada añu gana en participación y calidá de les fotografíes presentaes. En total, participaron cincuenta persones.

Cuenta Ramírez, con una llarga esperiencia en concursos de fotografía y más de setenta premios al costazu, que se movió a Cuaña con un pequeñu espeyu col que compunxo la imaxe ganadora. "Púnxelu enriba del muriu del paséu del faru y empecé a xugar con él. Tiré bastantes semeyes, asina que lo que más me costó foi escoyer una ente trenta o cuarenta versiones", esplica Ramírez, que participaba per primer vegada nel maratón cuañes.

Cunta esti vecín de Piedresblanques, aficionáu a la fotografía, que disfrutó cola visita a Cuaña, un conceyu que conoz mui poco. El faru foi lo que más llamó-y l'atención, asina que se centró en prindar una semeya distinta y finalmente llevó'l primer premiu. Aplaude amás la bona organización de la cita fotográfica cuañesa: "Paecióme que taba bien entamáu, con instrucciones clares y daben un mapa del conceyu, que ye un bon detalle".

Na categoría absoluta, a Ramírez siguiéronlu darréu nel podiu Javier Freitas y José Ramón Ron. Amás, David Pividal llevó'l premiu "Cuaña con ciencia" por una imaxe de la sala de catar circular de la ganadería cuañesa Cancello. Nesta edición tamién hubo una categoría específica pa los alumnos del colexu públicu Darío Freán Barreira.

"Cola ayuda del Gobiernu del Principáu d'Asturies"