La "Inmaculada" de los Selgas, declarada BIC a los cuatro años de la so fallida venta: el cuadru del Greco, por fin protexíu
El Principáu otorga al cuadru del Greco la máxima protección patrimonial y tien pendiente la de la quinta d'El Pitu, a la que la obra ta venceyada
La "Inmaculada" del Greco, espuesta en xunetu de 2021 na Quinta de los Selgas n'El Pitu, en Cuideiru. / Luisma Murias
El Gobiernu del Principáu esperó al 8 d'avientu, festividá de la Inmaculada Concepción, p'anunciar que, a lo último, declaró bien d'interés cultural (BIC) el cuadru atribuyíu al Greco, propiedá de la Fundación Selgas-Fagalde, nel que la Virxe apaez representada so esa advocación. La Conseyería de Cultura asturiana entamó en 2022 el procedimientu pa la declaración BIC d'una obra que tuvo colgada a lo llargo de décades nel palaciu de la histórica Quinta d'El Pitu, en Cuideiru, y que la Fundación propietaria intentó vender en 2020 al Muséu de Belles Artes de Budapest, n'Hungría, pa saniar les sos cuentes.
La venta de la obra, por una cifra que xubía a 6,2 millones d'euros, foi aprobada en 2020 pol patronatu de la Fundación Selgas-Fagalde, na que tán representaes instituciones asturianes como la mesma Conseyería de Cultura, l'Archidiócesis, la Universidá d'Uviéu y el Conceyu de Cuideiru. Sicasí, en febreru de 2021, el Ministeriu de Cultura, a propuesta de la Dirección Xeneral de Belles Artes y previu informe de la Xunta de Calificación, Valoración y Esportación de Bienes del Patrimoniu Históricu Español, alcordó declarar la inexportabilidad de la obra. D'esti xeitu, torgó la operación de venta.
Foi'l mesmu Ministeriu de Cultura el que, depués d'esa declaración, empobinó al Executivu asturianu, concretamente a la Dirección Xeneral de Cultura y Patrimoniu, pa indica-y, como yera preceptivo, que tenía d'entamar "el procedimientu de declaración d'esti bien como BIC, cola mira de reconoce-y la protección especial prevista na lexislación vixente" en vista del so "gran interés pal patrimoniu históricu". Asina, en marzu de 2022, el Plenu del Conseyu del Patrimoniu Cultural d'Asturies alcordó incoar l'espediente de la declaración BIC de la "Inmaculada" de los Selgas.
La "Inmaculada" d'El Greco. / Selgas
La obra , como fixo conseñar la Dirección Xeneral de Cultura del Principáu na resolución de la incoación del espediente BIC, ye "un oliu sobre llenzu de 109 x 57 centímetros que constitúi una reducción, con mínimes variantes, del que pintó'l xenial artista cretense Doménikos Theotokópoulos pa la capiya Oballe de Toledo".
A lo llargo de la tramitación del espediente, la Conseyería de Cultura atropó informes favorables a la declaración BIC de la Universidá d'Uviéu, la Real Academia de la Hestoria y el Real Institutu d'Estudios Asturianos (Ridea). Como pasu postreru primero de l'aprobación del decretu, el Conseyu de Patrimoniu Cultural del Principáu emitió un informe favorable'l pasáu 16 de xunetu.
L'analís presentáu pola Universidá d'Uviéu recueye que'l cuadru foi pintáu nos últimos años del Greco, ta datáu ente 1607 y 1613 y constitúi "una magnífica pieza que revela la complexidá de los recursos pictóricos de la pintura manierista del artista a la fin de la so vida". El RIDEA, pela so parte, destacó la vinculación "centenaria" de la obra con Asturies, "porque nada se conocía d'ella enantes de la so entrada na coleición de los hermanos Selgas allá pola última década del sieglu XIX".
Na descripción y contextualización de la obra, la Dirección Xeneral de Cultura citaba tamién a José Gudiol, una de les mayores autoridaes del sieglu XX n'España n'historia del arte. Según l'historiador, el cuadru de la familia Selgas-Fagalde podría ser "un estudiu preparatoriu" de la magnífica "Inmaculada" del Greco qu'anguaño se caltien nel Muséu de Santa Cruz de Toledo, anque él considera "más probable que se trate d'un ricordo o reducción" del cuadru qu'el Greco pintó na ilesia de San Vicente, na ciudá manchega.
Anque'l cuadru etiquetóse y méntase col títulu de "Inmaculada Concepción", la escena representada nel llenzu correspuende meyor a la de l'Asunción de la Virxe María, alzada al cielu depués de la so muerte polos ánxeles, razón pola que n'ocasiones tamién apaez asina mentada.
El pasáu mes d'ochobre, el plenu del Conseyu del Patrimoniu Cultural, el máximu órganu asesor en materia patrimonial del Gobiernu d'Asturies, dio la so aprobación a la declaración BIC del conxuntu patrimonial de los Selgas, n'El Pitu (Cuideiru). La Conseyería de Cultura abriera'l procedimientu pa protexer el legáu de los Selgas en xunu de 2023, depués de dellos desencuentros cola Fundación Selgas-Fagalde pola xestión de la so colección d'arte.
La declaración BIC afecta a tola Quinta de los Selgas, el palaciu, los sos xardinos, la ilesia de Jesús Nazarenu, la casa rectoral y les escueles d'El Pitu, ya inclúi la colección artística venceyada al heriedu de los Selgas, el so legáu documental y bibliográficu, de cuenta que, una vegada seya efectiva, en siendo aprobada pol Conseyu de Gobiernu, la "Inmaculada" del Greco va quedar doblemente protexía.
"Cola ayuda del Gobiernu del Principáu d'Asturies"
- El Principado autorizó en 33 días sacar carbón en Cerredo cuando para la mina de Narcea tardó 81
- ¿Qué opinan las familias de la hora extra de clases en junio y septiembre que tiene en pie de guerra a los profesores? Por un lado recelan y por otro ven 'maravilloso' la extensión del comedor
- Fallece la asturiana Belén del Valle, primera mujer que entró en la carrera fiscal
- Así son los sistemas de atraque para aeropuertos que desarrolla Asturias y en los que están interesados casi 70 terminales de Europa, Oriente Medio y América
- La SEPI se niega a rescatar de nuevo a Duro Felguera
- La autopista del Huerna ve la luz al final del túnel: ya hay plazo para retirar el argayón, que requerirá nuevas voladuras
- Adiós a la asturiana Belén del Valle, la primera mujer fiscal de España: 'Era única e irrepetible
- Estos médicos de Asturias investigan y han sido premiados por ello: una herramienta para medir la esquizofrenia, la relación entre hierro y alzhéimer...
