¿Una Navidá llibre d'infeiciones respiratories n'Asturies? Asina nos atacará'l gripe y el covid-19 estes fiestes

Al otru sen de lo que pasó l'añu pasáu, la Navidá que ta a puntu de llegar nun va venir acompañada d'una bayura de casos de gripe nin de covid-19. El panorama actual n'Asturies califícase por una fuerte presencia del virus respiratoriu sincitial (VRS), causante de la bronquiolitis, que suel ser el teloneru del virus gripal. De cumplise les predicciones de los espertos, la curva del gripe va empezar a xubir –entá nun se detectó esi ascensu– nun plazu relativamente curtiu, y el picu de la curva va rexistrase probablemente nel últimu tramu de xineru y el primeru de febreru. En cuanto al covid, los especialistes coinciden: nin ta nin, pel momento, se lu espera. 

Nes fiestes navidiegues del añu pasáu vendiéronse nes farmacies asturianes permunchos tests de gripe y covid. A non poca población, un virus respiratoriu estropió-y les celebraciones en familia. Nesta ocasión –siquier hasta la fecha– la situación ye bien distinta. "Ente ochobre y payares detectóse una cierta circulación de virus gripales B, que producieron una pequeña onda epidémica de mui baxa intensidá y qu'afectó principalmente a menores de 15 años y perpoco a les persones mayores", esplicó esti día a LA NUEVA ESPAÑA un observador atentu d'evolución epidemiolóxica.

Mentanto, los virus gripales A, que son los principales causantes de les ondes epidémiques intenses pel iviernu, empezaron a circular dende finales de payares y aumenten adulces. ¿Cuándo se va disparar la curva hacia arriba? Col gripe, la respuesta nun ye fácil porque'l momentu del biltar de la onda nunca ye previsible. Lo que sí suel repitise un añu y otru con abonda asemeyanza ye'l patrón d'ascensu y descensu de la curva. Con too y con ello, la respuesta ye que'l gripe empieza la so esguilada cuando empieza a baxar el virus respiratoriu sincitial. 

Na presente temporada, los VRS empezaron a circular activamente dende principios de payares y tán anguaño "nuna incidencia peralta, probablemente nel picu d'esti añu", precisa un médicu asturianu. Una vegada que los virus sincitiales algamen el cume y entamáu'l descensu, el virus del gripe A va empezar a arrobinase a mayor velocidá.

Les repercusiones del los VRS menguaron con relación al pasáu. El motivu ye la campaña d'aplicación, entamada en 2023, d'un tratamientu d'inmunización frente al virus respiratoriu sincitial en neonatos y lactantes qu'una vegada más abulta que ta dando bonos resultaos. Al igual que la temporada pasada, l'usu de los anticuerpos protectores "ta teniendo un impactu perimportante na prevención de los casos graves nos menores", indica un espertu, quien aprecia "mui bones cobertories que producen un amenorgamientu mui significativu de los ingresos por estes infecciones al respeutive de les temporaes anteriores". 

Sobre'l covid-19, la bona noticia ye que nun hai noticia. La circulación del virus ta en niveles perbaxos dende finales del branu, y nun hai nicios de qu'esti iviernu aporte una nueva onda epidémica. "Los pocos virus que s'aisllen siguen siendo subvariantes de los virus ómicron y les vacunes afayaíces que s'utilizaron esti añu ufierten bona protección frente a ellos", apunta un bon conocedor de los pericuetos epidemiolóxicos.

"Cola ayuda del Gobiernu del Principáu d'Asturies"