La Catedral d'Uviéu bate'l so récord de visites con 146.700 a lo llargo de 2024

Los datos turísticos de la Catedral nun tienen tope. La "Sancta Ovetensis" cerró l'añu con 146.700 tiques vendíos, según informó'l deán, Benito Gallego. "Son bones cifres, anque notemos que n'avientu hubo un poco menos de xente si comparamos los resultaos colos del añu pasáu", evaluó dempués de confirmar que l'añu rematáu dio continuidá al crecimientu empezáu en 2023 después la cayida pol zarru del templu na pandemia. Esi añu vendiéronse 131.160 entraes; mentanto en 2022 fueron 111.400 y en 2019, enantes de la pandemia fueron 115.000. L'aumentu de visites dase tamién nes xubíes a la torre, un programa que'l cabildru entamó'l 1 d'agostu de 2022 dempués d'un plan de rehabilitación nel que participó el Conceyu. Hubo 5.500 xubíes a lo llargo de los doce meses pasaos. 

Los bonos datos turísticos collechaos a lo llargo del añu como capital española de la gastronomía, treslladáronse a ún de los sos principales activos, la Catedral. "El númberu de visitantes depende muncho de los viaxeros que vienen a Uviéu y s'averen a ver la ‘Sancta Ovetensisis’", fae'l deán quien amesta que la llegada de l'alta velocidá a Asturies fomenta que los turistes s'arimen a conocer el monumentu. "Son munchos turistes pero tamién son importantes los nuesos abonaos, tenemos conferencies con ellos y actividaes que se desenvuelven como deseyamos: con aposientu, aselu y silenciu", esplica'l deán. 

Y qué fai el Cabildru col dineru que recauda. "Llabores de caltenimientu", esplica'l deán, mui cerca del so confesionariu, treslladáu estos díes del so llugar habitual. Siempre ta na capiella del rei Castu, pero esta selmana tuvo que se mover a la nave central porque empezó la instalación d'un andamiu pa siguir col arreglu del retablu de la capiella, del que s'encarga'l restaurador Pablo Klett.

"Cola ayuda del Gobiernu del Principáu d'Asturies"