La protección del quesu de Burgos (una variedá que se produz n'Asturies) va vetar que se faiga fuera del territoriu

Los productores castellanos llogren valtar l'últimu recursu en contra del sellu calidable d'un alimentu con ellaboración n'Asturies

Quesos nuna cinta de tresporte n'Arias. | IRMA COLLÍN

Quesos nuna cinta de tresporte n'Arias. | IRMA COLLÍN

Sixto Cortina (Traducción)

Dempués de 20 años de pleitos, los ellaboradores artesanos del popular quesu de Burgos na provincia del mesmu nome pueden yá tramitar la IXP (Identificación Xeográfica Protexía), lo que va llindar la so producción a dichu territoriu. Asina figura na solicitú de rexistru publicada esti día pol Diariu Oficial de la Unión Europea (DOUE), colo que s'entama'l sellu calidable pol que nagüen dende va tiempu les firmes queseres que la producen, cinco arrexuntaes na Asociación de Fabricantes de Quesu de Burgos (Afaquebur) y ente les que figura Flor de Burgos, planta adquirida va pocos años pola asturiana CAPSA. 

N'Asturies, la noticia nun pasó desapercibida nel sector agroalimentariu. Son delles les firmes qu'ellaboren na comunidá'l popular quesu fresco de Burgos, blancu, blandiu y aguacientu, orixinariamente ellaboráu con lleche d'oveya, pero qu'agora tamién usa la de vaca. Gorfolí y Mantequerías Arias figuren ente elles. Esta postrera tien la so planta de Vegalencia (La Ribera) dedicada principalmente a la producción d'esta variedá. Producción que podría igual vese afectada en casu de salir alantre la IXP, que llinda a Burgos la ellaboración del quesu de Burgos. 

Na empresa piden calma. "El procesu ta pendiente inda de la resolución de la UE y, ello ye, ye ceo pa facer especulaciones, tenemos de respetar los tiempos y esperar la resolución final", espliquen. Sicasí, aseguren qu'Arias estudia "toles implicaciones del tema y manifiestase tranquila al respeutive". 

La tramitación de la IXP ta yá entamada dempués de que'l Tribunal Supremu resolviera n'avientu refugar un recursu, l'últimu, contra la mesma de la Federación d'Industries Láctees (Fenil). Coles mesmes, el Ministeriu d'Agricultura pudo sacala adelantre p'allegría de los queseros burgaleses. De llograr la so aprobación, el denomináu Quesu de Burgos namás va ser aquel que se faiga na provincia y de trés tipos: Burgos, Burgos selectu y Burgos supremu. El documentu describe l'alimentu como "un quesu fresco, ellaboráu por aciu de coagulación enzimática de la lleche pasteurizao, d'amiestu de vaca y oveya, ensin prensáu nin maduración", y les pieces van dende 250 gramos a 2,3 kilos. Hai trés meses pa presentar alegaciones al documentu.

"Cola ayuda del Gobiernu del Principáu d'Asturies"

Suscríbete para seguir leyendo

Tracking Pixel Contents