Asturies lidera la cayida de les esportaciones pola debilidá de la siderurxa

Les ventes reculen un 6,6%, emburriaes pol descensu de les semimanufactures

Instalaciones d'ArcelorMittal en Xixón.

Instalaciones d'ArcelorMittal en Xixón. / Ángel González

Sixto Cortina (Traducción)

Asturies foi la comunidá autónoma onde más cayeron les esportaciones ente xineru y payares de 2024 en comparanza col mesmu períodu del añu anterior. En concretu, les ventes esteriores de la comunidá recularon un 6,6%, mentanto que les del conxuntu d'España rexistraron un comportamientu totalmente planu, del 0%, según los datos espublizaos esti día pol Ministeriu d'Economía, Comerciu y Empresa.

El valor de les esportaciones del Principáu hasta payares xubió a 5.416 millones d'euros, mientres que les importaciones repicaron un 0,9% interañal, hasta los 5.144,2 millones. Poro, nel acumuláu de los once meses del añu pasáu la comunidá llogró un superávit comercial de 271,8 millones, un 60,9% inferior al contabilizáu nel mesmu periodu del añu pasáu.

Dientro de les ventes esteriores asturianes, la partida que más cayó en comparanza col periodu anterior fueron les semimanufactures non químiques, con un retrocesu del 5,4%. Esti capítulu inclúi les esportaciones de los productos d'aceru d'ArcelorMittal, polo que'l descensu ye coherente cola debilidá xeneralizada del sector siderúrxicu nos mercaos occidentales, sometíos a la intensa importación de productos de países asiáticos, qu'arrecostinen menores costos medioambientales. 

Sicasí, otros artículos esportaos dende Asturies ente xineru y payares llograron un bon comportamientu, como por casu los bienes d'equipu, con unes ventes que repicaron un 6,3%. 

Nel conxuntu del país, les unvíos internacionales hasta payares axuntaron un valor de 354.726 millones d'euros, mentanto que les importaciones asitiaron nos 390.880 millones, polo que'l saldu comercial foi negativu, de 36.154 millones.

"Cola ayuda del Gobiernu del Principáu d'Asturies"

Tracking Pixel Contents