L'Acuariu de Xixón allivia'l desahuciu del gran parque marín d'Europa

Dos tortugues caretes adultes van llegar a Xixón procedentes del parque francés Marineland, que peslló a primeros d'añu depués de más de mediu sieglu d'actividá, dexando a 4.000 animales marinos en busca de casa

Les dos tortugues caretes que tuvieron dellos años nel Acuariu de Xixón, nel tanque con un cuidador, nuna fotografía d'archivu.

Les dos tortugues caretes que tuvieron dellos años nel Acuariu de Xixón, nel tanque con un cuidador, nuna fotografía d'archivu. / Julián Rus

Sixto Cortina (Traducción)

El mayor parque marín d'Europa, Marineland Antibes, allugáu na ciudá del mesmu nome, na Mariña Azul francesa, pesllaba les sos puertes el pasáu día 5 de xineru y dexaba detrás 54 años d'actividá ininterrumpida.

El so zarru obligó a busca-y un agospiamientu alternativu a cerca de 4.000 animales. Ente ellos, dos orques, "Wikie", de 23 años, y el so fíu "Keijo", de 11, qu'hasta agora yeren les estrelles del espectáculu que más tirón tenía ente'l públicu del Marineland y con un destín, en viendo la imposibilidá de que sobrevivan en llibertá, que se convirtió cuasi en cuestión d'Estáu nel país galu. Hasta puntu talu que torgó un alcuerdu pa treslladar les orques a Xapón polos riesgos amestaos del viaxe y les duldes xeneraes sobre los estándares de proteición que se dan nel país nipón pa estos animales, por cuenta de los que se dan n'Europa. 

Y cómo nun diba ser cuestión d'estáu si se tien en cuenta que'l zarru de Marineland vieno, en bona midida, pola nueva lexislación francesa que va prohibir de facto los espectáculos con cetáceos a partir del añu qu'entra. Tamién tien enforma que ver, según los espertos, el cambiu de sensibilidá en Francia al respeutive d'estos centros y la vida en cautiveriu de grandes animales marinos, que fixo que los 1,2 millones visitantes que llegó a tener el centru nos sos meyores momentos cayeren a menos un terciu nos últimos años. 

Mientres media Europa s'esmolecía por "Wikie" y "Keijo", Xixón féxolo por dos tortugues caretes que d'equí a poco van percorrer los más de 1.200 kilómetros que separen la turística localidá gala d'Antibes del Biopark Acuariu de Xixón.

"Nesti sector conocemos toos n'Europa y los conservadores, sobremanera, tán mui en contactu unos con otros. Asina que se sabía que Marineland diba cerrar primero inclusive de que s'asoleyara", cunta'l director del Acuariu xixonés, Alejandro Beneit. Asina que, conocíu l'inventariu d'animales del parque acuáticu que teníen de reasitiase n'otros llugares, "dixéronnos lo que teníen y a nós encaxábanos perbién facenos cargu de dos tortugues caretes qu'ellos teníen. L'añu pasáu morriónos una de les dos que taben con nós en Xixón, y por eso nos venía bien", amesta Beneit. Son dos exemplares adultos de gran porte: "De 80 y picu kilos una d'elles y 90 y picu kilos la otra", detalla'l director de la instalación xixonesa.

Nun va haber transacción económica pel mediu porque "estos animales nin se compren nin se venden. Ente les instituciones nun se-yos pon un valor económicu", esplica Beneit. El centru xixonés lo que sí que costeará ye "el treslláu dende Francia. La loxística de traeles hasta equí ponémosla nós, claro. Va ser un retu importante porque tien de facese en tresporte especial y poniendo munchísimu cuidáu", fae'l director.

Yá en Xixón, a la pareya tocará-y pasar un tiempu na debida aclimatación primero de pasar al so tanque definitivu. Tamién esa entrada va ser por fases. "El destín ye l'oceanariu del acuariu, que ye'l tanque principal, que tien un millón de llitros d'agua. Y van compartir espaciu cola otra tortuga careta que yá tenemos y con más especies, ente elles los tiburones toru", esplica Alejandro Beneit. Los espertos saben qu'esa convivencia tien que facese d'una forma planiao y progresivo, sobremanera, por que los actuales moradores del gran tanque nun reaccionen negativamente "a la entrada de dos animales tan grandes como son estos".

"Cola ayuda del Gobiernu del Principáu d'Asturies"

Tracking Pixel Contents