Asturies ye la comunidá que más recortó'l paru en 2024 y la que rexistró mayor aumentu d'ocupaos y activos

El desempléu baxó en 14.200 persones nel Principáu y creáronse 33.900 empleos, según la EPA

Paru n'Asturies.

Paru n'Asturies. / LNE

Sixto Cortina (Traducción)

Asturies foi la comunidá con mayor aumentu porcentual del empléu l'añu pasáu (8,56%), la de mayor recorte del paru (-27.32%) y la que más población activa ganó (4,41%), lo que nun quita pa que siga siendo la comunidá autónoma con menor tasa persones de más de 16 años trabayando o buscando empléu.

La Encuesta de Población Activa (EPA) del últimu trimestre de 2024, publicada esti día pol Institutu Nacional d'Estadística (INE), calcula qu'Asturies axuntaba una población de 896.200 persones de 16 años y más, de les que 467.400 clasificábense como actives, un 4,4% más que nel mesmu trimestre del añu anterior. Esti incrementu interañal, el más altu del país, asitia la tasa d'actividá de la comunidá nel 52,16%, la más alta dende'l tercer trimestre de 2016. Ente los homes esta tasa algama'l 57,19%, mentanto qu'ente les muyeres ye del 47,65%. Sicasí, la tasa d'actividá d'Asturies sigue siendo la más baxa d'España y llueñe de la media, del 58,48%.

La ocupación nel cuartu trimestre asitió en 429.600 persones, 7.700 más que nel trimestre anterior y 33.900 más que va un añu. El 83,8% de los ocupaos son asalariaos (el 78,2% nel sector priváu y el 21,8% nel públicu) y el 83,1% d'ellos tienen un contratu indefiníu. Hai que recular hasta'l primer trimestre de 2009 p'atopar un mayor númberu d'ocupaos n'Asturies. El Principáu foi la comunidá con mayor incrementu de la ocupación nel últimu añu, del 8,18%, mui perriba del 2,19% rexistráu nel conxuntu d'España.

La EPA calcula en 37.800 les persones que s'alcontraben en paru n'Asturies nel cuartu trimestre, siendo la cifra más baxa rexistrada nesti periodu dende l'entamu d'esta serie en 2002. Al respeutive del trimestre anterior contabilícense 5.200 paraos menos (- 12,18%) y respeutu al mesmu trimestre de va un añu 14.200 menos (-27,32%, la tasa de recorte más alta d'España y mui perriba de la media nacional del 9,28%). La tasa de paru asturianu asitia nel 8,09%, más de dos puntos per debaxo de la media nacional (10,61%).

A nivel nacional, el paru baxó en 265.300 persones en 2024, lo que supon un 9,3% menos qu'en 2023, mientres l'empléu creció en 468.100 puestos de trabayu (+3,8%), cerrándose l'exerciciu con un nuevu récord de 21.857.900 ocupaos y un númberu de paraos inferior a los 2,6 millones.

Baleares (+9.800), Murcia (+9.800) y País Vascu (+7.200) fueron les comunidaes onde más creció'l númberu de paraos, mentanto que Cataluña, Madrid y Canaries onde menos, con retrocesos de 44.600, 36.700 y un 29.400, respeutivamente.

"Cola ayuda del Gobiernu del Principáu d'Asturies"

Tracking Pixel Contents