El gripe n'Asturies toca techu depués d'un mes en cifres epidémiques

El númberu d'infectaos na comunidá pol virus gripal nesti iviernu foi, hasta la fecha, bultablemente inferior a la del exerciciu anterior

Gripe

Gripe

Sixto Cortina (Traducción)

La epidemia de gripe A n'Asturies abulta que yá llegó al so nivel máximu d'esti iviernu. Dempués de cuatro selmanes de xubíes significatives y siguíes de la curva d'incidencia, los especialistes consultaos por esti periódicu albidren que nesta última selmana de xineru puede tar algamándose'l picu de casos nuevos, y que lo previsible ye qu'a partir de la selmana qu'entra vaya viéndose a poco y a poco una baxada de la curva. Hasta la fecha, en términos globales, la cifra d'afectaos d'esti exerciciu foi bultablemente inferior a la del anterior.

Yá de cara a la campaña de la próxima seronda, el Conseyu de Ministros autorizó esti día la celebración d'un alcuerdu marcu pa la seleición de suministradores de vacunes frente al gripe estacional por un valor aproximáu de 277,8 millones d'euros destinaos a delles comunidaes autónomes, ente elles Asturies. El total aproximáu de dosis pa les campañes de gripe a lo llargo del periodu de vixencia d'esti alcuerdu, ente los años 2025 y 2028, ye de 24.916.471.

Según informa'l Ministeriu de Sanidá, son de vacunes pa delles comunidaes autónomes y dellos órganos de l'Alministración Xeneral del Estáu, amás de les ciudaes de Ceuta y Melilla. Enantes robláronse alcuerdos marcu pa la seleición de suministradores de vacunes frente al gripe pa les campañes de vacunación nos años anteriores, y "vistos los bonos resultaos llograos", la Comisión de Salú Pública, el día 15 de febreru de 2024, aprobó realizar un nuevu alcuerdu marcu pa la seleición de suministradores de vacunes frente al gripe estacional pa les temporaes incluyíes ente los años 2025 y 2028.

Nel alcuerdu participen Aragón, Asturies, Baleares, Cantabria, Castiella y Lleón, Castiella-La Mancha, Comunidad Valenciana, Estremadura, Comunidá de Madrid, Rexón de Murcia, Comunidá Foral de Navarra, La Rioxa y les ciudaes de Ceuta y Melilla, amás del Ministeriu de Sanidá, el Ministeriu de Defensa y la Secretaría Xeneral d'Instituciones Penitenciaries (Ministeriu del Interior). El plazu de duración va ser de dos años a partir de la formalización del mesmu y va poder ser oxetu de prórrogues d'hasta dos años, nun superando en nengún casu'l plazu máximu de cuatro años. 

Entrín y non, la incidencia del covid-19 caltien la tónica de los últimos meses tanto n'Asturies como n'España, con un impactu mui baxu.

"Cola ayuda del Gobiernu del Principáu d'Asturies"

Tracking Pixel Contents