Les torgues de Cultura modifiquen el proyeutu de les termes de Valdunu, en Les Regueres

El Conceyu tien que mover el zarru y prescindir del acristalamientu

El mosaicu de la villa romana de La Estaca va tener un muséu virtual en Santuyanu

Una de les zones de les termes romanes de Valdunu. | LUISMA MURIAS

Una de les zones de les termes romanes de Valdunu. | LUISMA MURIAS

Sixto Cortina (Traducción)

El Conceyu de Les Regueres modifica los proyeutos redactaos pa remocicar el zarru y la cubierta de les termes romanes de Valdunu y pa facer visitable el mosaicu de La Estaca. Los condicionantes qu'afita la Conseyería de Cultura motiva estos cambios nos dos diseños, asegura l'alcaldesa, Maribel Méndez.

Lo mesmo les termes de Valdunu que'l yacimientu de La Estaca fueron declaraos Bien d'Interés Cultural (BIC). Dambos proyeutos tán incluyíos nel plan turísticu del conceyu, que recibe financiación de fondos europeos. Van ser licitados "d'equí a poco", apunta la rexidora. 

Nel proyeutu de les termes de Valdunu nun se podrá recurrir a los acristalamientos previstos "por motivos de caltenimientu". Amás, "el zarru va tener que movese unos metros p'atras, más separáu", sorraya. 

La Conseyería de Cultura fixa tamién cuálos son los materiales que pueden ser utilizaos. Lo mesmo nel zarru como na cubierta actuales de les termes "nun se diben poder facer agora tal que tán", según la Conseyería, amiesta Méndez. 

El proyeutu pa visitar el mosaicu de la villa romana de La Estaca tamién tuvo que s'afayar a les esixencies de l'alministración asturiana. La pretensión inicial del Conceyu de que los visitantes pudieren contemplar la obra al pie del yacimientu, asitiando un cristal, nun se va entamar finalmente. "Vamos facer un muséu virtual", afirma l'alcaldesa de Les Regueres. 

El mosaicu podrá visitase con unes gafes de realidá virtual. Pa ello va haber que dir hasta un aula de la Casa de Cultura de Santuyanu, onde'l visitante va poder contemplar el yacimientu romanu. "Nun puede construyise edificación nenguna", fae Méndez. El Principáu considera que pal caltenimientu del mosaicu descubiertu en 2019 ye meyor que se caltenga nel estáu actual, anubríu.

"Los medios tecnolóxicos actuales pueden facilitar conocer estos elementos ensin tener que treslladase ellí", rescampla l'Alcaldesa. El presupuestu destináu a l'actuación nes termes de Valdunu xube a 90.000 euros mentanto que pal mosaicu de La Estaca conseñáronse 180.000. Anque estes cuantíes podríen modificase en función de les necesidaes, dientro del presupuestu total que'l Conceyu dispon pal plan turísticu.

Avientu

Esta iniciativa destinada a atropar visitantes dispon de 357.492 euros de financiación de los fondos europeos Next Generation. El conveniu pa desenvolver estos proyeutos roblóse en 2023 pola Conseyería de Presidencia, Retu Demográficu, Igualdá y Turismu y el Conceyu de Les Regueres. A les actuaciones nes termes de Valdunu y el mosaicu de La Estaca axúntase la meyora ambiental de los meandros del Nora y l'actuación na rede ciclu-senderista. 

El plazu marcáu pa concluyir les obres y recibir los fondos europeos ye avientu d'esti añu. Esta ye una ayuda imprescindible pa desarrollar estos proyeutos por que, apunta la rexidora , "col presupuestu municipal sería imposible".

"Cola ayuda del Gobiernu del Principáu d'Asturies"

Tracking Pixel Contents