Los cupos de pesca pa 2025: menos xarda y más pixín pa la flota asturiana
La recuperación de la pesquería del chicharru ye una realidá, esti añu llevántense les restricciones afitaes en 2022 a les captures de la especie

Una descarga l'añu pasáu nel Puertu d'Avilés. / Ricardo Solís
La Secretaría Xeneral de Pesca, que tien de cabezalera a l'asturiana de Lluanco Isabel Artime García, asoleyó'l conteníu de la resolución que publica tolos años por estes feches en mires d'afitar les cuotes iniciales de captures disponibles pa cada modalidá pesquera o censu pa les distintes especies de pexes contemplaes nos planes de xestión de los buques censaos nes cales del Cantábricu y Noroeste (qu'inclúi Asturies) y Golfu de Cádiz. En virtú del repartu decidíu, los pescadores asturianos –como los del restu de la Cornisa– van poder pescar esti añu más pixín, gallu y llagostín, caltiense estable la cifra de captures permitida de merluza y mengüen les posibilidaes pesqueres de xarda y abril.
La principal novedá d'esti añu ye que desapaez l'encamientu científicu de captura cero de chicharru afitada en 2022; esti cambiu débese a la distinta y meyor percepción del estáu de la población por mor de referencies de recién. Abulta que la biomasa de la población reproductora de xurel ta percima de la nueva llende de biomasa sol criteriu de Rendimientu Máximu Sostenible, mentanto que l'añu pasáu abultaba que la población taba per debaxo de la biomasa llímite. En base a esi nuevu datu, permítese otra vuelta la pesca dirixida de chicharru n'agües onde faenen los barcos asturianos y asígnase una posibilidá de captures de 8.802 tonelaes.
Rescamplen les xubíes de les cuotes d'otres especies de gran interés comercial, como les de gallu n'agües del Sur del Cantábricu, (3.942 tonelaes, 732 tonelaes más que l'añu anterior) y de pixín (4.340 tonelaes, 625 tonelaes más qu'en 2024). La cuota española de merluza sur (el stock del que dependen toles flotes asturianes en mayor o menor midida) reafítase con una cifra de 10.953 tonelaes, "gracies al bon estáu de la pesquería", según resalta la Secretaría Xeneral de Pesca, qu'amiesta: "Esta cantidá permite la estabilidá de la flota tanto nel Cantábricu y Noroeste como nel golfu de Cádiz".
Especies oxeto de recortes
Los TAC adoptaos pa la xarda y l'abril siguen los encamientos del Conseyu Internacional pa la Esploración del Mar (CIEM, ICES poles sos sigles n'inglés) y pa 2025 mengüen les captures al respeutive de la campaña anterior. En base al Total Almitible de Captures (TAC) de la Unión Europea, a España correspuénde-y en 2025 una cuota de 21.718 tonelaes de xarda, una tisoriada del 22% respeutu al añu anterior) y de 44.604 tonelaes d'abril, lo que supon un recorte del 5,41%. "Espérase qu'estos amenorgamientos nun pongan en riesgu la xestión pa cubrir les necesidaes de la flota", aseguren dende'l departamentu que dirixe Isabel Artime.
Per otru llau, la cuota de captures de llagostín –una especie que lleva años n'estáu críticu– de la división VIIIC asignada a España, estrema nes unidaes funcionales numberaes como 25 y 31. Al respeutive de la unidá funcional 25 (agües gallegues), en base al asesoramientu científicu del ICES y a l'aplicación del principiu de precuru, nun se van permitir captures en 2025. Nel casu del llagostín de la unidá funcional 31 (agües que tomen dende les verticales de les ríes d'Avilés, n'Asturies, hasta'l Bidasoa, en Guipúzcoa) increméntase la cuota pa España a 25 tonelaes, polo que se dobla práuticamente al respeutive de l'aplicada en 2024.
Les cuotes pesqueres asignaes a España recuéyense nel alcuerdu alcanzáu nel Conseyu de Ministros de Pesca de la Unión Europea celebráu'l pasáu avientu. En base a les mesmes y col porgüeyu de facilitar una meyor planificación de l'actividá pesquera a lo llargo del añu, procédese a repartir nel mes de xineru por aciu de resolución alministrativa los cupos definitivos de les distintes especies asignaos a España ente los distintos censos de barcos. Esta resolución tien efectos pa tola campaña de 2025, del 1 de xineru al 31 d'avientu.
"Cola ayuda del Gobiernu del Principáu d'Asturies"
- El libro escrito por una madre que se lee ya en colegios y que explica a los niños el problema de abusar de las pantallas: 'En mi casa el móvil está prohibido
- Detenida una pareja en Oviedo por tráfico de drogas en una operación en la que participaba una mujer de 87 años que se movía con andador
- Aumentan los accidentes con animales en Asturias: estos son los nueve puntos negros
- El terremoto de Arcelor que sacude Asturias: traslado de oficinas a la India y mil empleos en juego
- Los tres 'torpedos' que ha lanzado ArcelorMittal en Europa impactan en Asturias: estas son las medidas que hacen temblar la siderurgia
- La reacción en Estrasburgo de Barbón, 'preocupado' por el anuncio de Arcelor: su confianza en 'una negociación' y la necesidad de 'una respuesta contundente de Europa
- La envergadura del traslado de servicios de ArcelorMittal a la India, que afecta a 31 entidades de siete países (y en España, sobre todo a Asturias)
- Motín a bordo: varios patrones piden la cabeza del presidente de las cofradías