Uviéu lidera'l repique añal de nacencies n'Asturies, con un 15% más
L'aumentu de la natalidá traduzse nuna media de 20 nácaros más al mes en 2024 al respeutive del añu anterior, mui percima de l'asturiana, que foi de seis

Uviéu lidera'l repique añal de nacencies n'Asturies / LNE
El conceyu d'Uviéu lideró'l repique añal de nacencies n'Asturies a lo llargo de 2024, con un 15 por cientu más al respeutive del añu anterior. El datu d'Uviéu resulta especialmente llamativu porque la medría nel conxuntu d'Asturies foi muncho más modesta, de menos del dos por cientu, según les series que publicó va poco la Sociedá Asturiana d'Estudios Económicos ya Industriales d'Asturies (SADEI) sobre'l movimientu natural na población, cola referencia de los datos del Institutu Nacional d'Estadística (INE).
Uviéu rexistró a lo llargo de 2024 un total de 1.797 nacencies, mentanto que nel añu anterior nacieren 1.554 neños y neñes nel conceyu. La comparanza ente dambes cifres dexa una medría del 15,6 por cientu nel exerciciu recién rematáu. El cómputu de nacencies n'Asturies tamién presentó una cifra meyor nel exerciciu pasáu, anque'l crecimientu foi menor, al pasar de 4.587 en 2023 a un total de 4.665 nel añu pasáu, lo que supon un aumentu del 1,7 por cientu, cuasi catorce puntos porcentuales menos que'l rexistráu na capital del Principáu. Xixón, el conceyu más pobláu d'Asturies, tuvo unos datos bien distintos, yá qu'en 2024 rexistró 1.201 nacencies mentanto que l'añu anterior contabilizara 1.234, lo que supon un descensu del dos por cientu, aprosimao.
Agostu, mes más fecundu
L'aumentu de la natalidá n'Uviéu ente 2023 a 2024 foi de 243 nacencies, lo que se traduz nuna media de 20 nacencies más al mes. Agostu y ochobre fueron los meses más fecundos en nácaros, con 183 y 170, respeutivamente, mentanto que febreru foi'l de menos nacencies, con 105. Pel momento, inda nun se conocieron los datos sobre movimientos migratorios, determinantes pa saber si Uviéu ganó o perdió población a lo llargo del añu pasáu. Pero esti repique de les nacencies, mui perriba de la media asturiana, contribúi a un fortalecimientu demográficu de la capital asturiana, que yá en 2023 foi'l conceyu con mayor crecimientu de población, en contabilizándose'l saldu vexetativu ente nacencies y fallecimientos y tamién los movimientos migratorios tantu interiores como esteriores. Ello ye qu'Uviéu ganara a 1 de xineru de 2024 un total de 2.959 habitantes al respeutive de la mesma fecha del exerciciu precedente p'asitiar percima de los 220.000 habitantes, una población a la que nun llegaba dende l'añu 2018, la meyora más importante en númberu d'habitantes ente los 20 conceyos de toa Asturies con un balance demográficu positivu.
L'aumentu de la natalidá n'Uviéu contribuyó a amortiguar el crecimientu vexetativu negativu (la diferencia ente nacencies y fallecimientos), qu'en 2023 foi de 2.051 persones y agora, colos datos yá cerraos de 2024, menguó a 1.844 persones. Sicasí, el númberu d'uniones matrimoniales caltúvose estable al dar cifres práuticamente idéntiques: 791 nel añu 2023 y 790 a lo llargo del pasáu exerciciu.
"Cola ayuda del Gobiernu del Principáu d'Asturies"
- ¿Por qué Asturias tiene (por cuarto año consecutivo) la tasa más alta de cáncer del país y cuáles son los tumores más frecuentes?
- ¿Cuáles son los 31 destinos que tendrá este año el aeropuerto de Asturias? El último operará todos los martes con billetes de ida y vuelta por 86 euros
- Tres alumnos de Oviedo se meten entre los cien mejores de España en el examen MIR (y uno de ellos queda en el puesto 37)
- Vacas asturianas sanas sacrificadas por el protocolo de la tuberculosis: su carne acaba en el mercado sin dejar beneficio a los ganaderos
- Los tres países a los que Arcelor desvía su inversión (y en uno construirá otra acería)
- El colmo de la burocracia: la surrealista historia de una gijonesa de 90 años que ha tenido que renunciar a la ayuda para poner una ducha
- Los asturianos que 'se salieron' en la prueba MIR: la vocación de ayudar, una remontada tras varios suspensos y un alma de cirujano
- Los 200 millones que se juega Asturias en la guerra arancelaria de Trump: los dos sectores más afectados