Cuco Suárez fixo de l'amistá un arte: el creador llavianés vuelve a les sales d'esposiciones
"Don’t cry for me" ye la primer amuesa individual en seis años del artista, que vuelve a la primer llinia superada una crisis vital y arropáu polos sos collacios, na galería uvieína de Guillermina Caicoya
Cuco Suárez, al pie d'ún de los sos dibuxos na esposición "Don’t cry for me", en Guillermina Caicoya Galería. / David Cabo
Va seis años que Cuco Suárez (La Pola Llaviana, 1961) nun presenta obra nueva nuna esposición individual. Nun dexó de participar en coleutives, pero l'estrozu que sufrió col so proyeutu d'arte frustráu en Llaíñes (Sobrescobio) menguó-y l'ánimu y la salú, y hasta agora, yá repuestu, nun se sentía con enerxía abando como pa entamar un proyeutu dafechu de so. Na so recuperación y vuelta a primer llinia tuvieron muncho que ver los sos amigos, artistes y galeristes, que tuvieron por él nos malos tiempos y lu acompañaron hasta equí. Agora, inaugura, en Guillermina Caicoya Galería, n'Uviéu, "Don’t cry for me", una frase que yá utilizó en dalguna sonada intervención artística anterior y qu'agora, amás del títulu de la esposición, bien podría lleese como un mensaxe sobre'l so actual estáu vital.
Cuco Suárez, l'artista desgualdráu que se pasió desnudu peles cais d'Uviéu en delles de les sos performances, almite agora que ta "un poco nerviosu" pol so realcuentru col públicu.
Sobre trapos usaos y puercos, usando galipote en cuenta de pintura convencional, tien estampaes figures de sapos estrapayaos contra'l firme de la carretera. "N'inglés tienen nome. Llámense ‘roadkill’", informa, y hai páxines d'internet dedicaes a ellos, a toa triba de bichos prensaos poles ruedes de los coches. Diz qu'al pie de so casa abonden esos animalucos, pero él ye cuidadosu y evita pillalos. Tien un amigu, el pintor Miguel Galano, que los recueye nes sos salíes pel campu y mánda-ylos, secos y empaquetaos, per corréu; otra, l'artista Natalia Pastor, mánda-y semeyes cuando los tropieza.
A Cuco Suárez l'asuntu sírve-y pa cavilgar sobre les prieses y l'escasu respetu col que'l mundu se mueve: "Vamos mui apriesa". Ye una obra de denuncia social, avisa, cola que quier "mete-y pela cara" a la xente eses coses qu'a él tantu-y ofiénden. L'artista tamién pon en relación esti trabayu, qu'entamó en 2014, cola escatoloxía relixosa y el pescudar sobre'l destín final del cuerpu depués de la muerte.
L'amuesa, na galería d'otra de les sos amigues, Guillermina Caicoya, ye una esposición compuesta por alredor de quince cuadros y dalguna pieza escultórica: unos botiyos pintaos en dorao, plateao y bronce, que simbolicen el poder del dineru, de la política y el pueblu, y que recuperó d'una producción pal Muséu de Belles Artes d'Asturies.
Foi la galerista uvieína la que-y suxurió estampar una figura xigante d'un sapu estrapayáu al fondu de la galería, sobre la paré, y Adolfo manzano, otru de los sos bonos amigos, ta echándo-y un gabitu, exerciendo como comisariu de la esposición.
Cuco Suárez ta llistu pal realcuentru y a partir de la inauguración de "Don’t cry for me", y mientres dure, promete dexase cayer tolos díes pela galería, a disposición del so públicu.
"Cola ayuda del Gobiernu del Principáu d'Asturies"
- Descubren petróleo y gas en estas zonas de Asturias... pero solo serán viables si el crudo se encarece
- Los motivos por los que Asturias tendrá el tipo de IRPF más alto de España para las menores rentas
- Retraso de cuatro horas en el tren Madrid-Asturias por la muerte de un hombre en el trayecto
- Francisco Espinosa, el empresario andaluz que acaba de comprar una empresa asturiana clave para defensa: 'La región es un polo industrial atractivo
- Habla el socialista que dimitió en el Principado por la protección del lobo: 'Por fin hay sentido común
- Alerta en los Picos de Europa: el hielo primitivo de una icónica cueva se derrite
- Crónica de una jornada negra en las carreteras asturianas: tres muertos y una herida grave en cuatro accidentes
- Este sábado habrá eclipse solar y se verá en Asturias: lugar, horario y medios para poder disfrutarlo
