El gripe y el covid afloxen n'Asturies: les cifres qu'amuesen una epidemia iverniza muncho menos agresiva
Los ingresos hospitalarios por infeiciones respiratories gafes menguaron un 27% nel presente exerciciu, según la Conseyería de Salú
El gripe y el covid afloxen n'Asturies / LNE
El descensu d'agresividá del gripe y el covid-19 na presente temporada de seronda ya iviernu xeneró una fuerte mengua de la mortalidá global n'Asturies. Nos cuatro meses que van d'ochobre de 2024 a xineru de 2025, nel Principáu rexistráronse un total de 4.468 decesos. Nel mesmu periodu del añu anterior –ente ochobre de 2023 y xineru de 2024– fueren 4.915. Esto ye, 447 fallecimientos más.
¿Qué estrema esti iviernu del anterior? A falta d'un analís más fondu, la gran fienda ente dambos periodos céntrase na menor incidencia esti añu de les infeiciones respiratories agudes, sobremanera de les que mayor impactu xeneren nes persones mayores: el gripe, de siempre, que la so curva ta agora en fase de descensu, y el covid-19, vixente nos últimos años y que lleva meses nunos niveles d'actividá mínimos.
Según datos asoleyaos pol Observatoriu de Salú n'Asturies, portal que depende de la Conseyería de Salú, ente esti iviernu y l'anterior vese una diferencia nuclear tocante a infeiciones respiratories: el descensu de casos graves y, poro, d'ingresos hospitalarios. Los téunicos de la Conseyería indiquen que la cifra d'hospitalizaciones por cuadros respiratorios gafos menguó "un 27 por cientu" nesta seronda-iviernu.
Si se repara nel cuadru de cifres qu'acompaña a esta información (estrayíes de los informes de la Sociedá Asturiana d'Estudios Económicos ya Industriales, SADEI, y del monitor de mortalidá MoMo), pescanciase que les diferencies bultables ente dambos periodos de tiempu márquenles los meses de payares, avientu y xineru.
La Navidá de 2023
Los últimos díes d'avientu de 2023, sobre too nes feches de Navidá, fueron un periodu de llaceries causaes pol covid y el gripe. Lo mesmo pasó, d'un xeitu entá más acentuáu, en xineru de 2024, mes nel que se computó l'apolmonante datu de 1.606 muertos, la cifra de letalidá más elevada dende aquel ablayante picu del covid que sufrió Asturies na seronda de 2020. Sicasí, nesti pasáu mes de xineru, rexistráronse nel Principáu 1.343 muertes, un númberu que posiblemente nun haya que dar entá como definitivu, pero que marca una cayida de 263 finaos con relación al contabilizáu un añu primero.
Tamién foi considerable l'amenorgamientu d'avientu de 2024 al respeutive del mesmu mes del exerciciu anterior: 1.094 decesos frente a 1.231, lo qu'implica un descensu de 137 muertos. Asemeyada foi la mengua de payares de 2024 con relación a payares de 2023, con 129 decesos menos.
"Cola ayuda del Gobiernu del Principáu d'Asturies"
- Descubren petróleo y gas en estas zonas de Asturias... pero solo serán viables si el crudo se encarece
- Los motivos por los que Asturias tendrá el tipo de IRPF más alto de España para las menores rentas
- Retraso de cuatro horas en el tren Madrid-Asturias por la muerte de un hombre en el trayecto
- Francisco Espinosa, el empresario andaluz que acaba de comprar una empresa asturiana clave para defensa: 'La región es un polo industrial atractivo
- Habla el socialista que dimitió en el Principado por la protección del lobo: 'Por fin hay sentido común
- Alerta en los Picos de Europa: el hielo primitivo de una icónica cueva se derrite
- Crónica de una jornada negra en las carreteras asturianas: tres muertos y una herida grave en cuatro accidentes
- Este sábado habrá eclipse solar y se verá en Asturias: lugar, horario y medios para poder disfrutarlo
