Asturies ye la tercer comunidá cola xornada llaboral más curtia, afirma FADE

Asturies ye la tercer comunidá autónoma cola xornada llaboral más curtia d'España. Asina lo afirma un cálculu ellaboráu pola Federación Asturiana d'Empresarios (FADE), qu'indica que la media d'hores de trabayu selmanales na comunidá ye de 38,3. Esto ye, per debaxo del máximu de 40 que rixe na lexislación española dende 1983 y apenes una hora más que les 37,5 que'l Gobiernu nacional quier afitar esti añu.

FADE sostien que, de facto, Asturies tien una de les selmanes llaborales más menguaes del país, namás per detrás del País Vascu y Navarra. Pa calcular cómo ye la xornada n'Asturies y teniendo en cuenta que nos convenios coleutivos el tiempu de trabayu axústase en cómputu añal, FADE toma la media d'hores trabayaes al añu en cada comunidá autónoma a tenor d'esos convenios. El resultáu p'Asturies ye de 1.747,93 hores añales, cifra a partir de la cual la patronal –teniendo en cuenta los descansos, festivos y vacaciones– determina un promediu selmanal de 38,3 hores.

La FADE llega a esti resultáu utilizando una metodoloxía encontada no axustao por dos sentencies xudiciales, una del Tribunal Supremu en 2016 y otra del Tribunal Superior de Xusticia de Castiella y Lleón en 2017. 

El referíu fallu del Supremu determinó que con calter xeneral la xornada tien un máximu de 1.826 hores al añu. La otra sentencia esplica'l métodu pa llegar a esa cifra, que "s'atopa detrás de permunches regulaciones emanaes del Ministeriu de Trabayu a lo llargo de la historia". Según los maxistraos, pa establecer el tope añal nun ye abondo con multiplicar les 40 hores selmanales poles 52 selmanes del añu, sinón qu'a los 365 díes del añu tienen de restase 48 domingos, 24 medios díes de descansu selmanal adicional, 12 festivos y 30 díes de vacaciones.

Con esa resta quedaríen 251 díes de trabayu efeutivu. La sentencia diz que la xornada selmanal de 40 hores "habría qu'estremala de normal ente 5,5 díes de trabayu" –cuidao que l'Estatutu de los Trabayadores afita un descansu selmanal de 1,5 díes–, y dello resultaríen 7,27 hores al día. Y ye multiplicando eses hores polos 251 díes cuando se llogra'l datu de 1.826 hores añales, que n'Asturies baxa a 1.748.

"Cola ayuda del Gobiernu del Principáu d'Asturies"