La Escuela d'Inxeniería Informática potencia la formación n'IA

La Escuela d'Inxeniería Informática de la Universidá d'Uviéu, en collaboración con empathy.ai, empresa del grupu Empathy Holdings, entamó una iniciativa pionera pa que los sos estudiantes puedan desarrollar proyeutos d'intelixencia artificial utilizando una infraestructura de servidores avanzada. Esta propuesta enxarétase dientro del "Empathy AI Challenge", un concursu académicu diseñáu pa fomentar la creatividá, el talentu y l'anovación nel ámbitu de la IA.

El "Empathy AI Challenge" ta dirixíu a los estudiantes matriculaos nel cursu d'Arquitectura del Software de la Escuela d'Inxeniería Informática de la Universidá d'Uviéu, que van poder trabayar cola IA d'empathy.ai nun entornu optimizáu y seguru. Por aciu de la infraestructura de servidores apurrida pola tecnolóxica asturiana, los participantes van poder desenvolver los sos proyeutos con accesu a una capacidá computacional d'altu rendimientu, garantizando privacidá y eficiencia ensin variaciones nel rendimientu.

En palabres de José Emilio Labra Gayo, catedráticu del Departamentu d'Informática de la Universidá d'Uviéu y coordinador de l'asignatura, "esti tipu de concursos afalen la motivación de los estudiantes al abri-yos una ventana a les meyores teunolóxiques de recién axeitándose col texíu empresarial asturianu."

"Ye importante que los futuros inxenieros de software entiendan que la intelixencia artificial ye una ferramienta que pueden usar y controlar como cualesquier otra. Con esti challenge, convidámoslos a usala y anovar, por que dexe de ser una “caxa máxica” y se convierta nun modelu qu'apoderen y controlen", afirma Ana García, coordinadora del “Empathy AI Challenge” en Empathy Holdings.

Pa facer posible esti retu, empathy.ai realizó una significativa inversión na so capacidá de GPU y cuenta multiplicar por diez esa capacidá primero de finales de xunu. Esta ampliación va permitir executar modelos avanzaos como DeepSeek R1 con tolos sos parámetros disponibles, afitando l'entornu de trabayu como un referente en computación d'altu rendimientu pa IA.

"Disponer de la nuesa propia infraestructura d'alta capacidá, equipada con GPUs avanzaes, va dexanos desarrollar y esplegar Modelos de Llinguaxe de Gran Escala (LLMs) pa crear modelos d'IA personalizaos y llograr independencia estratéxica de grandes proveedores. D'esta miente, vamos impulsar una anovación sostenible alliniada colos valores éticos y sociales de la nuestra empresa" esplica David Suárez, Direutor d'Inxeniería n'Empathy Holdings.

Esta collaboración ente la Escuela d'Inxeniería Informática d'Uviéu y empathy.ai reafita'l compromisu de dambes entidaes cola formación y el desenvolvimientu del talentu nel sector teunolóxicu, apurriendo a los estudiantes ferramientes d'última xeneración pa potenciar el so aprendizaxe y la so proyeición nel ámbitu de la intelixencia artificial.

"Cola ayuda del Gobiernu del Principáu d'Asturies"