Antemanadamente y con más tiempu, les nueves ayudes pa remocicar horros

Contentu na Asociación del Horru Asturianu polos cambios na convocatoria asturiana de subvenciones pa la restauración d'horros, paneres y cabazos, qu'en 2025 caltien la mesma dotación económica del añu pasáu, 450.000 euros, pero incorpora cambios que faciliten l'accesu y la execución de los proyeutos. Esos cambios son, concretamente, el pagu antemanáu de les ayudes, pol 75% del costu total de cada intervención y un máximu de 6.000 euros, y l'ampliación del plazu d'execución, d'un añu dende la comunicación de la concesión.

Los nuevos criterios de la convocatoria, publicada va unos díes nel Boletín Oficial del Principáu, busquen, según la Conseyería de Cultura, "facilitar la recuperación del patrimoniu cultural". El presidente de l'Asociación del Horru, Víctor Manuel Suárez, refirióse esti día a les dificultaes p'acoyese a les subvenciones coles qu'hasta agora s'atopaben munchos propietarios, polos problemes pa xustificar nel plazu afitáu la execución de les obres tanto pola so duración, de mes y mediu cuandu menos, como pola escasez d'artesanos "horreros". "Muncha xente arrenunciaba a la subvención", indicó.

Fernando Mora, arqueólogu de l'Asociación del Horru, reparó en que'l pagu antemanáu de les ayudes dexa a los propietarios de los horros con proteición integral, yá seyan persones físiques o xurídiques, "trabayar de manera más segura, ensin adelantrar el so dineru". Esta flexibilización nes bases de la convocatoria ye, según Mora, "perpositiva" y va "revertir en que se remocique un mayor númberu d'horros". 

Tamién valoró positivamente la evolución de la dotación económica, que dende'l so entamu incrementóse, según los sos datos, en más d'un 200%, de 150.000 a 450.000 euros. Tanto la Conseyería de Cultura como l'Asociación del Horru falen del "ésitu" de la convocatoria. Mora afirma que permitió que se "restauraren horros d'antigüedá y calidá". Agora, amestó, "podrán remocicase más y con más aposientu". 

Les solicitúes a esta convocatoria de subvenciones pueden presentase hasta'l 4 de marzu y dende l'Asociación del Horru ofrécense pa resolver duldes y asesorar.

Horros catalogaos

L'Asociación del Horru entamó l'añu pasáu la catalogación de los horros susceptibles de ser declaraos BIC, bienes d'interés cultural, "de manera progresiva y gradual". Anguaño, hai 50 horros na llista, per toa Asturies, y el trabayu sigue. "Ye perimportante porque nun hai horros con esi grau de proteición", sorraya Fernando Mora. 

La Conseyería de Cultura tamién acaba de convocar les ayudes, por un importe total de 125.000 euros, a "la promoción y puesta en valor del patrimoniu cultural asturianu, tanto material como inmaterial", incluyíos los archivos de tradición oral. Nesti casu'l plazu de solicitúes conclúi'l 26 de febreru.

"Cola ayuda del Gobiernu del Principáu d'Asturies"