La esportación asturiana sufre más que nenguna la floxera industrial d'Europa: estos son los sectores que más se resienten

La floxera xeneralizao de la industria europea, un sector que dexa especialmente albentestate a la economía d'Asturies, contribuyó a que les esportaciones del Principáu en 2024 axuntaren 5.777,2 millones d'euros, un 8,1% menos qu'añu primero, lo que supon la mayor cayida de toles comunidaes autónomes. Pela contra, les ventes esteriores del conxuntu d'España algamaron los 384.464 millones, el segundu meyor datu nun añu de la serie histórica y una meyora interañal mínima, del 0,2%. Asina lo señalen los datos publicaos va unos díes pol Ministeriu d'Economía, Comerciu y Empresa.

La fráxil situación de la industria –en bona parte de les sos cañes y subsectores– conozse bien nel descensu esportador de dellos productos procedentes d'Asturies, como'l fierro y l'aceru, que cayeron un 11,3%; y los metales non ferrosos (-3,2%), qu'inclúin materiales como'l cinc. Ello ye que son dos ríbriques bien relevantes nel sector esterior asturianu, apurriendo en xunto l'añu pasáu ingresos de 2.400 millones d'euros, esto ye, más del 40% del total del volume esportáu.

Tamién hubo descensos en partíes como les manufactures de minerales non metálicos (-8,2%); el papel, cartón y artículos de pasta de papel (-15,1%); la maquinaria y equipu industrial xeneral (-12,4%); les máquines pa trabayar metales (-34,8%); los plásticos en formes primaries (-36,5%); los productos químicos orgánicos (-6,5%) y los inorgánicos (-5,5%).

Coles mesmes, destacó'l retrocesu d'unvíos de petróleu (-19,4%) y de carbón (-79,4%), magar nesti segundu casu trátase fundamentalmente de reenvíos dende los puertos asturianos, qu'almacenen cargamentos procedentes al tiempu d'otros países enantes d'esportalos otra vuelta al so destín final. Sí rescampla, sicasí, el reenvíu de gas natural, pasando de los 20 millones d'euros de 2023 a los 91 millones de 2024, lo que representa una esguilada porcentual del 355%. Un fenómenu que tien que ver cola regasificadora d'Enagás n'El Musel (Xixón).

L'atonía industrial certifícase al reparar en que los unvíos d'Asturies a Alemania (el 7,6% del total) esbarrumbáronse un 35,3%, baxando a 441 millones l'añu pasáu. La economía xermana, perindustrializada, lleva dos años en recesión. Tamién cayeron les esportaciones a Italia, nesti casu un 9%; a Bélxica (-20,5%) y a Países Baxos (-17,2%).

Dientro d'Europa sí se producieron medríes de ventes: del 10,4% a Francia (país qu'acueye'l 12,6% de les esportaciones asturianes); del 44,7% a Reinu Uníu y del 4,4% a Portugal.

Fuera del continente, ye destacable'l pequeñu retrocesu (-3,2%) de los unvíos a Estaos Xuníos, asitiándo nos 233,5 millones d'euros. Esta ye la cantidá, por tanto, que s'utiliza como referencia del posible impautu na economía asturiana de los aranceles que quier imponer el presidente Donald Trump al aceru y a los productos metalúrxicos.

Saldu positivu. A pesar de la cayida de la esportación y d'un repique de les importaciones –del 1,5% y hasta los 5.596,7 millones–, la balanza comercial asturiana caltuvo'l signu positivu, dando un superávit de 180,5 millones. Con too y con ello, foi un saldu inferior nun 76,7% al del 2023.

Depués d'Asturies, les comunidaes nes que baxó la esportación fueron Madrid (-5,4%), País Vascu (-5,1%), Aragón (-4,9%), Comunidad Valenciana (-2,7%), Navarra (0,6%), Cataluña (-0,5%).

"Cola ayuda del Gobiernu del Principáu d'Asturies"