La edificación garra puxu n'Asturies cola mayor ufierta de pisos dende 2010 y estes cifres demuéstrenlo
Los proyeutos d'obra visaos en 2024 axunten 2.608 viviendes, el 37% más interañal
La edificación garra puxu n'Asturies / LNE
Asturies xeneró a lo llargo de 2024 proyeutos por valor de cuasi 250 millones d'euros pa construyir un total de 2.608 pisos y cases, la cantidá más alta dende 2010. La edificación garró asina puxu nun contestu de precios crecientes (tanto pa la compraventa como pal arriendu ) y de grandes dificultaes d'accesu a la vivienda pa munches families pol severu desaxuste qu'esiste ente la demanda (al alza por factores como l'aumentu del empléu y la creación de llares, l'abaratamientu del creitu ...) y la ufierta (atrullada pola escasez de suelu disponible, l'atascu burocráticu nel desenvolvimientu del nuevu, problemes regulatorios nel mercáu del arrendamientu, espansión de los pisos turísticos…).
Los datos comentaos vienen de los visaos de direición d'obra que faen los apareyadores, a los que correspuende supervisar los proyeutos de nueva edificación (seyan promociones privaes o de vivienda pública). Ello ye que son un indicador adelantáu d'actividá y recueyen les obres que tán entamaes o próximes a entamar. Acordies con la información d'esos visaos, el panorama asturianu de la edificación presenta traces como les que vienen darréu:
Más viviendes
Les 2.608 viviendes visaes en 2024 suponen el 37,7% más que les de 2023 y el mayor númberu en catorce años. El despegue ye particularmente intensu nel casu de la edificación en bloque: 2.002 pisos, el 50% más qu'un añu enantes. Nel capítulu de les viviendes unifamiliares (605), la meyora ye del 8%.
Más inversión
El presupuestu amestáu de les obres d'execución xube a 248,3 millones d'euros, cantidá inédita dende 2010. Nesti últimu exerciciu -cuando'l sector encadenaba el so tercer añu en depresión depués del españíu de la burbuya financiera ya inmobiliaria en 2008-, los arquiteutos téunicos visaron n'Asturies proyeutos pa 3.119 viviendes, con un presupuestu (248,7 millones) cuasi idénticu al de 2024 pa un millar de cases menos. La diferencia nel promediu por vivienda (unos 80.000 euros en 2010 y 95.000 en 2024) esplícase pola variación de los costos nesti tiempu.
Por territorios
Un informe de la patronal de los constructores asturianos, CAC-Asprocon, referíu al períodu xineru-payares, señala que nesi tiempu Uviéu lideró'l númberu de viviendes a construyir (701, el 32% del total visáu hasta payares n'Asturies), per delantre de Xixón (634). "Uviéu y Xixón suelen alternase", matiza'l presidente de la CAC-Asprocon, Joel García. Siero y Llanes apaecen de siguío y per delantre d'Avilés. Y Llanes, Siero y Castrillón vuelven rellumar na ufierta de xalés.
"Hai demanda", resume Joel García pa esplicar la esguilada na edificación que suxeren los indicadores estadísticos. El presidente de los constructores acolumbra que "2025 y 2026 tamién van ser años bonos". Albidra un avance non esplosivu, sinón "sosteníu" de l'actividá y del empléu, con un crecimientu d'alredor del millar de puestos de trabayu na plantía asalariada que ta dientro del perímetru del Conveniu Colectivu pa la Construcción y l'Obres Públiques d'Asturies, formada agora por unes 11.500 persones. El conxuntu de los ocupaos nel sector, incluyíes actividaes auxiliares y trabayadores autónomos, xube a 27.500.
La demanda ye intensa y la ufierta repica pel llau de la vivienda de nueva construcción, acordies con los datos comentaos. ¿Cómo van evolucionar los precios? A lo llargo de 2024, el metru cuadráu encarecióse a una velocidá perriba del 7% interañal, con un valor mediu percima de los 1.400 euros, el mayor dende 2012 en términos nominales (ensin considerar l'efeutu de la inflación). "Si somos quien a poner más suelu nel mercáu, los precios van contenese", cavilga Joel García.
Podríen facelo coles mesmes si tamién despega a lo último la ufierta de vivienda nueva de proteición oficial (de promoción pública o privada y con preciu tasáu pola Alministración). El Principáu comprometióse en 2024 a tener n'obres cerca de 600 pisos públicos. Y "sigue viva" una negociación ente l'Alministración asturiana y los constructores p'actualizar los "módulos" que determinen el preciu máximu de venta de los pisos protexíos d'iniciativa privada, un segmentu del mercáu qu'a lo llargo de décades foi crucial pa facilitar l'accesu a la vivienda de munchos llares nuevos n'Asturies.
"Cola ayuda del Gobiernu del Principáu d'Asturies"
- Descubren petróleo y gas en estas zonas de Asturias... pero solo serán viables si el crudo se encarece
- Los motivos por los que Asturias tendrá el tipo de IRPF más alto de España para las menores rentas
- Retraso de cuatro horas en el tren Madrid-Asturias por la muerte de un hombre en el trayecto
- Francisco Espinosa, el empresario andaluz que acaba de comprar una empresa asturiana clave para defensa: 'La región es un polo industrial atractivo
- Habla el socialista que dimitió en el Principado por la protección del lobo: 'Por fin hay sentido común
- Alerta en los Picos de Europa: el hielo primitivo de una icónica cueva se derrite
- Crónica de una jornada negra en las carreteras asturianas: tres muertos y una herida grave en cuatro accidentes
- Este sábado habrá eclipse solar y se verá en Asturias: lugar, horario y medios para poder disfrutarlo
