Arcelor, ensin planes p'allargar la vida de los sos fornos asturianos, tolo contrario qu'en Francia

ArcelorMittal nun tien planes p'allargar la vida útil de los altos fornos d'Asturies a diferencia de lo qu'asocede coles instalaciones de Francia. Nel país vecín, la multinacional siderúrxica va entamar esti añu'l remocique de dos fornos altos nes factoríes de Dunkerque y Fos-sur-Mer con una inversión de más de 272 millones d'euros. Fontes de la multinacional señalaron qu'al quedar en suspensu los planes de descarbonización n'Europa qu'incluyíen la sustitución de fornos altos por plantes de reducción directa de mineral de fierro (DRI) con hidróxenu verde –pola so falta de viabilidá nel actual contestu políticu y de mercáu– nun quedaba otro más qu'allargar la vida útil de los fornos altos, que taba escosando, pa caltener capacidá de producción d'aceru.

Sicasí, les mesmes fontes destacaron que nel casu de Fos-sur-Mer va reformase un fornu que taba anguaño fuera de serviciu pa remplazar, a partir de 2026, al que ta agora activu. Esto ye, la factoría va quedar con un solu fornu altu.

Ye lo que puede asoceder n'Asturies si nun s'allarga la vida del fornu altu A de Xixón. Esta instalación acaba la so vida útil a finales de 2026 –en siendo ampliada coles obres d'igua del incendiu que sufrió en 2023– y Arcelor nun tien, anguaño, planes p'allargala. En 2026 va entrar en serviciu la nueva acería eléctrica de Xixón y les necesidaes d'arrabiu van baxar al consumir principalmente chatarra. Sicasí, con un fornu altu namás en Xixón (el B) nun habría producción abondo d'arrabiu pa cubrir la demanda de l'acería d'Avilés. Por eso dende los Gobiernos d'España y d'Asturies reclámase una segunda acería llétrica p'Avilés.

N'Arcelor destaquen que cada vez ye más costoso caltener en funcionamientu fornos altos y qu'el 25% de los costos de producción de les factoríes asturianes yá tán venceyaos a les emisiones de CO2 y que van crecer col endurecimientu de la política medioambiental.

"Cola ayuda del Gobiernu del Principáu d'Asturies"